Капуза схлусіў. Вось дадзеныя Харчовай і сельскагаспадарчай арганізацыі ААН. Як бы нам ні хацелася ўбачыць Беларусь у дзясятцы найбуйнейшых вытворцаў малака, яе там няма. Беларусь знаходзіцца на 22-м месцы ў сусветным рэйтынгу з вытворчасцю 7,5 млн. тон малака за год.
Вядоўца праграмы «Па факце: рашэнні Першага» на YouTube-канале «Белта» Алена Крылова заявіла, што Беларусь уваходзіць у ТОП-5 краін-экспарцёраў малочнай прадукцыі ў свеце. І таксама схлусіла.
Наперадзе нас у спісе ТОП-экспарцёраў яшчэ Германія, Нідэрланды, Францыя, Бельгія, Польшча і Ірландыя. Такім чынам, атрымліваецца, што Беларусь на 10 месцы і не ўваходзіць у ТОП-5.
Схлусіла Алена Крылова і пра статыстыку па вытворчасці сыра:
«Па вытворчасці сыра Беларусь знаходзіцца на чацвёртым месцы ў свеце. Былі б і на трэцім – пасля ЗША і Новай Зеландыі, але Еўразвяз у планетарнай статыстыцы чамусьці ідзе за аднаго гульца. У любым выпадку, Аўстралію і Швейцарыю ў валавой вытворчасці сыру Беларусь апярэдзіла».
У спісе найбуйнейшых вытворцаў сыру Беларусь знаходзіцца на 11-м месцы. У тройцы найбуйнейшых: Еўрапейскі Саюз, Расея і ЗША. І нават калі б Еўразвяз не ішоў за аднаго гульца, а быў падзелены па краінах, Беларусь была б яшчэ ніжэйшай у рэйтынгу. Адны толькі Італія, Нямеччына і Францыя па адзіночцы вырабляюць сыра больш, чым Расея. Так што Беларусь яны адсунулі б на 18-е месца.
Адзіны рэйтынг, звязаны з сырам, дзе Беларусь, сапраўды, можна ўбачыць на чацвёртым месцы – гэта рэйтынг экспарту сыру. І гэта толькі пры ўмове, калі Еўразвяз зноў лічыць за аднаго гульца. Тады пасля Еўразвязу, ЗША і Новай Зеландыі ў спісе будзе ісці Беларусь. Ёй належыць крыху больш за 3% ад сусветнага экспарту. Ну, а калі параўноўваць краіны, то ў Беларусі толькі 9-е месца.
Украіна пагрузілася ў блэкаўт па невядомых прычынах
Беларускія дзяржаўныя СМІ вельмі дзіўна расказваюць пра ўкраінскі блэкаўт.
«Сусветная арганізацыя аховы здароўя б'е трывогу ў сувязі з цяжкімі ўмовамі, у якіх апынуліся мільёны жыхароў Украіны напярэдадні зімы. Прыход маразоў можа ўяўляць смяротную пагрозу з-за каласальных пашкоджанняў энергасістэмы», — распавядаюць на «Беларусь-1».
«У Кіеве і дзясятках абласцей цалкам адключылася энергасістэма. У тым ліку атамныя электрастанцыі…. Адсутнасць не толькі святла, але і цяпла і вады працягвалася з серады да вечара чацвярга. Тэрміны поўнага аднаўленне сістэмы не вядомыя», — паведамляе АНТ.
Гэта значыць, чамусьці ва Ўкраіне адключылася энергасістэма і людзі апынуліся ў вельмі цяжкіх умовах. А з-за чаго ці з-за каго ўсё гэта адбылося — пра гэта ў сюжэтах ні слова.
Дзяржаўныя медыя імкнуцца не згадваць аб тым, што гэта Расея разбурыла інфраструктуру сваімі ракетнымі ўдарамі.
Вось, напрыклад, што піша дзяржаўнае інфармагенцтва БелТА:
«Паводле інфармацыі Мінэнерга Украіны, з-за пашкоджання элементаў інфраструктуры энергасістэмы без энергіі засталася пераважная большасць спажыўцоў краіны. Таксама былі аварыйна адключаныя ад энергасістэмы ўсе тры якія знаходзяцца пад кантролем Кіева атамныя электрастанцыі »
Гэтая навіна з расійскага інфармагенцтва ТАСС, але ў яе арыгінале хаця б сказана аб паветранай трывозе на тэрыторыі Украіны. У беларускую версію нават гэта не ўвайшло.
Відавочна, што дзяржСМІ наўмысна замоўчваюць аб ролі Расіі ва ўкраінскім блэкаўце, каб не ачарніць яе пазітыўны імідж перад простымі беларусамі.
А вось на канале АНТ пайшлі яшчэ далей. Там заявілі, што ў блэкаўце вінаватая і сама Ўкраіна.
«Хоць у надыходзячым блэкаўце вінаватыя не толькі расійскія ракеты. Кіеўскі суд арыштаваў актывы адразу 5 прадпрыемстваў крытычнай інфраструктуры. У Херсоне, Кіраваградзе, Жытоміры, Роўна, Чарнігаве. Падстава — алігархі энергічна кралі прыбытак. Зразумела, што пішуць пра расейскі сьлед. Зразумела, што тут ёсць элемент палявання на вядзьмарак. Але відавочна і тое, што ўкраінскую энергетыку ставілі на калені даўно і сістэмна».
Па-першае, акцыі аблэнерга арыштавалі не ў Чарнігаве, а ў Чарнаўцах. А па-другое, пасыл такі — украінцы зараз сядзяць без святла і цяпла з-за карупцыі. Аднак, той факт, што, гэтыя пяць аблэнерга працягваюць працаваць замоўчваецца. Як арышт каштоўных папер звязаны з перабоямі ў забеспячэнні электраэнергіяй жыхароў Украіны пасля абстрэлаў, таксама не тлумачыцца.
Дарэчы, да вайны ўкраінская энергетыка, мела лішкі электраэнергіі і паспяхова іх экспартавала — 3,5 млрд кілават-гадзін у год. Не падобна, што яна так ужо стаяла на каленях.
Акрамя замоўчвання аб бамбёжках Расіяй мірнай інфраструктуры Украіны, беларускія дзяржСМІ таксама распаўсюджваюць фейкі аб тым, што большасць украінскіх уцекачоў у Еўропе паразітуюць — працаваць не жадаюць, але і вяртацца дадому таксама не плануюць. Пра гэта паведаміў вядучы навін АНТ Аляксандр Аверкаў.
«Большасць прыезджых не спяшаюцца працаўладкавацца і адмаўляюцца вывучаць мовы тых краін, у якія прыбылі. Больш за тое, шмат хто наўпрост заяўляе, што не мае намеру вяртацца дадому пасля завяршэння расейскай спецаперацыі».
Насамрэч у Польшчы большая частка ўкраінскіх бежанцаў зарабляе сабе на жыццё сама. Па афіцыйных звестках, 600 тысяч чалавек знайшлі сабе працу. У Літве працуе ўжо каля паловы працаздольных бежанцаў, у Чэхіі — каля 40%. У Нямеччыне — 15%.
Пры гэтым, паводле апытанняў, 70% тых, хто працуюць у Германіі, плануюць рана ці позна вярнуцца ва Украіну. У Польшчы такіх каля 60 працэнтаў. А вось застацца назаўжды ў Германіі выказалі сваё жаданне толькі 3 працэнты, а ў Польшчы такіх 6 працэнтаў.
Увогуле, тое, што большасць не плануе вяртацца дадому нават пасля заканчэння вайны — хлусня.
Блогеры Кац і Варламаў жывуць разам
Блогер Максім Кац жыве разам з Іллём Варламавым. Пра гэта ў сваім аўтарскім стрыме на тэлеканале «Звязда» заявіў расійскі пісьменнік Міхаіл Шахназараў.
«Максім Кац, які жыве з Іллём Варламавым адкрыта, ён заявіў, што трэба пісаць інструкцыі аб тым, як рускім салдатам здавацца ў палон».
Гэтымі словамі ён відавочна намякае на тое, што расейскія апазіцыянеры маюць няправільную, на думку Шахназарава, арыентацыю. Адкуль у яго такая інфармацыя?!
Справа ў тым, што ў кастрычніку ў Іллі Варламава выйшла відэа, запісанае ў такім жа інтэр'еры, як на відэа ў Максіма Каца. Інтэрнэт-карыстальнікі гэта заўважылі і пачалі жартаваць, што блогеры мусіць, разам жывуць і з адной кватэры здымаюць.
Пасля чаго Максім Кац у сваім твітары патлумачыў, што Варламаў проста зняўся ў ягонай студыі.
Увогуле, нехта жартаваў, а Шахназараў цяпер гэтыя жарты пераказвае зусім сур'ёзна.
У Каца ёсць жонка. І паўгода таму ў іх нарадзілася дзіця. Хоць з Варламавым яны таксама добра знаёмыя — жонка Каца раней працавала з ім і паднімала продажы яго блога.
Украінцы дамалявалі да талісмана ЧС па футболе вусы Гітлера
Украінскія заўзятары ў Катары дамалявалі талісману чэмпіянату свету па футболе вусы Гітлера. Пра гэта паведаміў тэлеграм-канал «Жоўтыя слівы Прэміум».
«Заўзятары з краіны дзе «няма нацызму» не змаглі ўтрымаць свае душэўныя парывы падчас ЧС па футболе…
Яны здагадаліся дамаляваць да талісмана гульняў вусы Гітлера і пайсці з ім на стадыён».
Тэлеграм-канал таксама апублікаваў відэа, якое выдаецца за прадукцыю арабскай тэлекампаніі Аль-Джазіра і па задумцы павінна пацвярджаць, што ўсё так і было - і ўкраінцаў затрымала паліцыя. Але насамрэч гэта не так.
Прадстаўнікі Аль-Джазіры абверглі, што гэты сюжэт іхні. Яны сцвярджаюць, што стыль афармлення відэа сапраўды падобны, але ў назве стадыёна дапушчаны памылкі, а некаторыя фармулёўкі не адпавядаюць стылю журналістыкі тэлеканала. Увогуле, Аль-Джазіра такіх сюжэтаў не выпускаў, а «Жоўтыя слівы» апублікавалі фэйкавы відэасюжэт.
