«Храм для стартапераў» і іншыя інвестыцыі ў IT ад алігарха Керымава

Новае

«Храм для стартапераў» і іншыя інвестыцыі ў IT ад алігарха Керымава

Нашым калегам з The San Francisco Standard (SF Standard) удалося знайсці праекты расейскага алігарха Сулеймана Керымава ў Крэмніевай даліне на дзясяткі мільёнаў долараў.

Керымаў уклаў парадку 28 мільёнаў долараў у стартапы. Інвестыцыі дасталіся тром праектам: 3 мільёны ў фонд пасеўных інвестыцый Vestor In, 20 мільёнаў у кампанію Luminar Technologies, якая распрацоўвае тэхналогіі для беспілотных аўтамабіляў (пасля выхаду фірмы на IPO кошт акцый вырас да 150 мільёнаў долараў), і 5 мільёнаў у венчурную кампанію Startup Temple Fund.

Сулейман Керымаў. Фота: AFP via Getty Images

У студзені 2016 года Startup Temple Fund купіў Царкву Багамаці Гвадэлупскай у Сан-Францыска. У гістарычным зданні бізнесмены арганізавалі «храм для стартапаў». З царквы хацелі стварыць прастору для IT-мерапрыемстваў, аднак у выніку праект апынуўся нявыгадным і яго закрылі.

Геры Калман, кіраўнік падраздзялення Transparency International у ЗША, патлумачыў, што Крэмніевая даліна прыцягвае алігархаў таму, што ў стартапах лёгка хаваць грошы. Гэта пацвярджае нядаўні даклад аналітычнай арганізацыі German Marshall Fund, згодна з якім адвакаты, рыэлтары і менеджары хедж-фондаў не абавязаныя паведамляць уладам аб падазроных транзакцыях, у адрозненне ад банкаў.