Чуццём Лукашэнкі палкоўнік Андрэй Багадзель захапляўся 9 жніўня 2024 года ў эфіры перадачы «PRO армію» на «СБ ТБ»: «Ён у свой час сапраўды прадугледзеў, што трэба займацца не нейкай зялёнай энергетыкай <...>, а стварыў атамную электрастанцыю». Важнасць такога рашэння Багадзель падмацаваў прыкладам з Еўропай, якая развівала зялёную энергетыку, а цяпер нібыта вымушаная перайсці на дровы.
— Я думаю, у інтэрнэце можна лёгка знайсці, як немцы абаграваліся гэтай зімой ужо пры дапамозе печак і дроваў. Памятаеце, як Пуцін калісьці заяўляў: «Вы што, будзеце дровамі грэцца?», — звярнуўся Багадзель да эксперта па нацыянальнай бяспецы Аляксандра Цішчанкі.
— Польшча вуглём топіць дагэтуль, — дадаў суразмоўца.
— Аказваецца, што гэты нямецкі цуд, заходнееўрапейскі цуд — гэта быў усё ж такі расейскі газ, які пампаваўся па [газаправодах] «Паўночных патоках», — растлумачыў палкоўнік.
— І беларускія пялеты, — адзначыў Цішчанка.
Мінулай зімой у Нямеччыне знізіліся цэны на газ і пячное паліва, а надвор'е было цёплым.
Журналісты Weekly Top Fake параўналі энергетычны баланс гэтай краіны 2023 года са справаздачай за 2021 год, калі Нямеччына яшчэ купляла газ у Расеі. Мы паглядзелі, як за гэты час змяніўся аб'ём спажывання энергіі з біямасы, да якой адносіцца драўніна. Аказалася, што і тры гады таму, і год таму з яе выпрацавана прыкладна 50 млрд кВт/г.
Спажыванне газу і вугалю скарацілася, а атамная энергетыка цалкам сышла. Гэта кампенсавалі зялёнай энергіяй.
Толькі 4% дамоў у Нямеччыне ацяпляюцца дровамі альбо пялетамі. Такі вынік перапісу насельніцтва 2022 года. Для параўнання ў Расеі, у якой неабмежаваны доступ да таннага газу, дамоў з пячным ацяпленнем — 10%, згодна такому ж перапісу насельніцтва ў 2020 годзе. У некаторых рэгіёнах іх доля даходзіць да 50%.