Фэйк 1: Польскіх сілавікоў вучаць змагацца з уцекачамі
«Польская паліцыя і вайскоўцы адпрацавалі на вучэннях супрацьстаянне мігрантам.
На відэа ўсё ў духу “дэмакратычнай Еўропы" — акружылі, павязалі, павезлі.
Заключную частку — забойства і выкіданне на тэрыторыю Беларусі вырашылі не паказваць», — напісалі аўтары посту і ў якасці доказу прымацавалі відэа.
Праваабаронцы сапраўды фіксавалі жорсткае абыходжанне з мігрантамі з боку польскіх і беларускіх сілавікоў. Аднак відэа, паказанае тэлеграм-каналам «Невальфовіч», не мае да гэтага ніякага дачынення.
Журналісты «Лукавых навін» звярнуліся ў паліцыю Паморскай вобласці ў Польшчы: там сказалі, што паліцыя такую трэніроўку не праводзіла.
Затым журналісты звязаліся з 16-й Паморскай механізаванай дывізіяй, каб высветліць, што менавіта адбываецца на апублікаваным у тэлеграм-канале відэа. Аказалася, што гэтая трэніроўка была часткай тактычных вучэнняў з войскамі пад назвай «Zalew-23». Практыкаванне на відэа было адным з тактычных эпізодаў, адпрацаваных падчас трэніроўкі з OPP (Польскі аналаг АМАПу).
«Мэтай навучання была падрыхтоўка салдат да прэвентыўных дзеянняў па барацьбе з натоўпам і рэагаванні ў выпадку такіх падзей. Гэта адбылося 29 сакавіка недалёка ад Балтыйскай касы ў Паморскай вобласці», — адказалі ў дывізіі.
Камандзе «Лукавых навін» таксама ўдалося атрымаць каментар Міністэрства нацыянальнай абароны Польшчы. Там заявілі: «Гэта чарговы абсурдны матэрыял, які ўпісваецца ў агрэсіўную дэзынфармацыйную дзейнасць Расеі і Беларусі ў інфармацыйным асяроддзі, асабліва ў сацыяльных сетках.
Асноўнымі элементамі вучэнняў былі правядзенне аперацый на выпадак тэракту (выратаванне закладнікаў), вядзенне выведкі ВМФ у напрамку Гданьскага заліву і Віслінскага заліву, правядзенне паказальных дзеянняў у кірунку Гданьскага заліву і дзеянні ў выпадку забруджвання».
