9 мая і немцы 

Ігар Тур і Юры Васкрасенскі ў эфіры ютуб-праекта «Галоўны. Тур» раскрытыкавалі ўкраінскія ўлады за тое, што Уладзімір Зяленскі запрасіў прадстаўнікоў Нямеччыны 9 траўня наведаць Украіну.

«- Дробязь, але яна мае вельмі такі фундаментальны характар для абгрунтавання вось гэтай фразы пра дно і калі з нізу стукаюць: Зяленскі запрасіў Штайнмаера на свята.

- Я ў тэлеграм-канале “Галоўны. Тур. таксама аб гэтым пісаў. Калі Кіеў запрашае, пры ўсёй палітычнай павазе і нейтралітэце да ўладаў Германіі, але запрашаць у Кіеў на 9 траўня немцаў - ну гэта здавалася настолькі трызненнем, чаго быць не можа зусім. Але вось пры Зяленскім такое магчыма.

- Ён не разумее, што такое ўвогуле паліткарэктнасць, бо для Нямеччыны гэта трагедыя».

Па-першае, Зяленскі прапанаваў прэзідэнту Нямеччыны Франку-Вальтару Штайнмаеру прыехаць у Кіеў 9 траўня, але не на свята. У гэтым годзе ніякіх афіцыйных святочных мерапрыемстваў у Кіеве не было.

Па-другое, нагадаем Туру і Васкрасенскаму, што ўсё гэта трызненне і непаліткарэктнасць запрашаць немцаў на 9 мая, як яны выказаліся, сталі магчымыя далёка не пры Зяленскім.

Першы прэзідэнт Расіі Барыс Ельцын яшчэ ў 1995 годзе запрасіў на святкаванне 50-годдзя Перамогі кучу сусветных лідэраў, у тым ліку тагачаснага канцлера Германіі немца Гельмута Коля. 

Потым да гэтага рабіў і Уладзімір Пуцін. У 2005 годзе ён запрасіў канцлера Германіі Герхарда Шродэра на святкаванне 60-годдзя Перамогі. І той наведаў Парад Перамогі.

У 2010 годзе тагачасны прэзідэнт Расіі Дзмітрый Мядзведзеў запрасіў на святкаванне 65-й гадавіны Дня Перамогі Ангелу Меркель. 

А ў 2015-м Меркель на запрашэнне Пуціна наведала Маскву на наступны дзень пасля параду, каб аддаць даніну памяці загінуўшым воінам.

Цікава, Тур і Васкрасенскі асудзяць непаліткарэктныя і абуральныя, на іх думку, дзеянні расійскіх кіраўнікоў, якія яны здзяйснялі рэгулярна на працягу 27 гадоў?!

Лукашэнка збіўся з ліку: так шмат палітвязняў

Абмяркоўваючы, як «удала Аляксандр Лукашэнка даў інтэрв'ю агенцтву Асашыэйтад Прэс», міністр інфармацыі Уладзімір Перцоў у «Клубе рэдактараў» назваў яго гуру.

«Мы прывыклі да высокага ўзроўню прэзідэнцтва. Што наш прэзідэнт сапраўды гуру, мы ўжо з гэтым прызвычаіліся. Што ён сапраўды можа выступаць, адказваць на любыя пытанні проста адразу, глыбока ў тэме». 

А вось як праходзіла інтэрв'ю насамрэч:

«Але я не настолькі занураны ў гэтую праблему, каб сказаць па плане там у іх ідзе, у расейцаў, як яны кажуць, ці бо я гэта адчуваю.

- Больш за тысячу чалавек застаюцца ў турмах...

- Учора мне сказалі амерыканцы, што 500. А вы кажаце больш за тысячу. Для мяне гэта навіна. Але я крыху вызвалюся, палічу... Я не ведаю колькі ў зняволенні знаходзіцца ў вас у зняволенні ў ЗША, у Германіі, у іншых краінах, я не ведаю. Што ў нас іх шмат знаходзіцца журналістаў я не ведаю дакладна, шчыра вам скажу. Але сёння ж пацікавлюся».

Можа быць міністр інфармацыі Перцоў так тонка патроліў Лукашэнку, што ён наадварот, не здолеў выразна адказаць на некаторыя чаканыя пытанні. Але, хутчэй за ўсё, гэта проста беспадстаўная ліслівасць.

МЗС РФ назваў хлуснёй заявы Салаўёва, Кісялёва і Сімоньян

У расійскім МЗС заклапаціліся інсінуацыямі аб тым, што Расея можа прымяніць ва Украіне ядзерную зброю. 

Падобна, МЗС пачуў заявы прапагандыстаў Уладзіміра Салаўёва, Зміцера Кісялёва і Маргарыты Сімоньян, а таксама дэпутата Дзярждумы Аляксея Жураўлёва. Вось што яны заявілі ў эфіры расейскіх тэлеканалаў: 

«Наогул, на брытанскіх выспах, здаецца, загаворваюцца. Навошта пагражаць ядзернай зброяй бязмежнай Расіі, седзячы ўвогуле-то на маленькай выспе? Востраў такі малы, што адной ракеты Сармат дастаткова, каб яго ўтапіць раз і назаўжды. Усё ўжо падлічана. Гэта ўсяго толькі адзін пуск, Барыс, а Англіі няма», - заяўляў у сваёй перадачы Зміцер Кісьлеў. 

А вось, што казаў дэпутат Жураўлёў: 

«Адзін Сармат і былі брытанскія астравы і няма брытанскіх астравоў.

-Ну мы ж сур'ёзныя людзі.

-Не, а я сур'ёзна і кажу».

Аналагічныя словы казала і Сімоньян:

«Неверагоднае, што ў рэшце рэшт гэта скончыцца ядзерным ударам мне ўяўляецца больш верагодным, чым такое развіццё падзей. Да жаху майму, з аднаго боку. З іншага боку, да разумення, ну што значыць так.

-Ну мы вось у рай». 

У тым жа ключы выказваўся і Уладзімір Салаўёў:

«Як высвятляецца, адзін Сармат - мінус адна Вялікабрытанія. А то яны неяк зусім хамяць». 

У той жа час, прадстаўнік МЗС РФ назваў падобныя выказванні хлуснёй: 

«Гэта наўмысная хлусня. У ядзернай вайне не можа быць пераможцаў, і яна не можа быць развязана».

У Расеі, як нідзе шануюць ветэранаў 

Расейскія каналы напярэдадні 9 мая пафасна ўспаміналі ветэранаў Вялікай айчыннай вайны і расказвалі аб тым, як краіна ім удзячная.

«Героі, без якіх не было б нас. Нашы ветэраны, якія ўсімі сіламі самааддана і бясстрашна набліжалі Перамогу над фашысцкімі захопнікамі. Мы дзякуем ім за подзвіг не толькі 9 траўня — заўсёды!

Я зараз назаву лічбу, яна страшная. На ўсю Расею засталося крыху больш за 20 тысяч удзельнікаў ВАВ. Крыху больш за 20 тысяч на нашу краіну».

Аднак, за пафаснымі прамовамі хаваецца бесстаронняя праўда. Дастаткова паглядзець усяго пару лічбаў, пра якія мала гавораць на ТБ, каб пераканаецца, як насамрэч у Расеі ставяцца да ветэранаў. 

Так, удзельнікам і інвалідам Вялікай айчыннай вайны ў Расіі да 9 мая выплацілі 10 тысяч расійскіх рублёў, што адпавядае прыкладна 150 доларам. Для параўнання, у Беларусі кожны ветэран атрымаў 700 долараў, у Казахстане - 2300, ва Узбекістане - 1350, у Кыргызстане 1188 долараў, у Таджыкістане - каля 240. Меньш чым у РФ толькі ў Туркменістане - 57 долараў.

Увогуле, як аказалася, матэрыяльны эквівалент падзякі для ветэранаў у краіны-спадчынніцы Вялікай Перамогі адзін з самых маленькіх сярод постсавецкіх краін.