Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Журналісты БРЦ – лаўрэаты нацыянальнай прэміі «Вольнае слова» Беларускай асацыяцыі журналістаў за расследаванні ў 2018, 2019, 2020, 2021 і 2022 гадах. На «Вольным слове» у 2021 годзе каманда БРЦ атрымала першае месца ў катэгорыі «Аналітыка».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
«...дзякуючы рашэнню прэзідэнта Лукашэнкі». Выкрыццё фэйка польскага суддзі, які ўцёк у Беларусь — ад Media IQ
Не распавёў Томаш Шмыт і пра тое, што будынак храма мінімум да кастрычніка 2022 года належаў дзяржаве.
Партнёрскі матэрыял
Каталіцкі храм у Магілёве адрамантавалі і перадалі вернікам «дзякуючы рашэнню прэзідэнта Лукашэнкі», распавёў былы польскі суддзя Томаш Шмыт. У пачатку траўня 2024 года ён пераехаў у Беларусь і папрасіў ва ўладаў прытулку. Каманда Media IQ вывучыла гісторыю касцёла і высветліла, што ўсё было зусім не так, як кажа Шмыт.
Польскі экс-суддзя Томаш Шмыт, які пасля пераезду ў Беларусь дае каментары беларускім дзяржаўным СМІ і вядзе перадачу «У тэме» на YouTube-канале БелТА, 6 чэрвеня 2024 года апублікаваў у сябе ў сацсетках відэа з Магілёва. Яно знята на фоне катэдральнага касцёла Унебаўзяцця Дзевы Марыі і Святога Станіслава. У ім Шмыт распавядае, што гэты храм адрамантавалі і вярнулі вернікам дзякуючы Аляксандру Лукашэнку — нібыта гэта было яго рашэнне.
«Гэта выдатны касцёл у стылі барока. Касцёл быў адрамантаваны дзякуючы рашэнню прэзідэнта Лукашэнкі. У канцы ХХ стагоддзя ён вярнуўся ў каталіцкую групу. Раней, наколькі я памятаю, тут была бібліятэка, але дзякуючы рашэнню прэзідэнта Лукашэнкі вярнуўся гэты касцёл каталікам», — кажа Томаш Шмыт на відэа.
Насамрэч катэдральны касьцёл Унебаўзяцьця Дзевы Марыі і Святога Станіслава, які ў 1935 годзе канфіскавалі савецкія ўлады, вярнулі вернікам яшчэ ў 1990 годзе. Тады Беларуссю кіраваў Вярхоўны Савет БССР. Храм адрэстаўравалі да 1994 года. Гэта значыць да прыходу Аляксандра Лукашэнкі да ўлады.
Не распавёў Томаш Шмыт і пра тое, што будынак храма мінімум да кастрычніка 2022 года належаў дзяржаве, а каталіцкай парафіі яго толькі перадалі ў карыстанне.
