Хто абмяркоўвае пастаўкі знішчальнікаў Кіеву?
26 студзеня выданне Politico паведаміла, што пытанне пастаўкі знішчальнікаў пачалі абмяркоўваць краіны NATO. З гэтай нагоды разгарнуліся цэлыя дэбаты, бо ў Еўропе некаторыя чыноўнікі і дыпламаты заявілі, што іхныя ўрады больш не лічаць гэтую ідэю бескарыснай. А адзін з амерыканскіх суразмоўцаў Politico заявіў, што Вашынгтон лічыць немагчымымі пастаўкі знішчальнікаў Кіеву ў дадзены момант.
«Там ёсць чырвоная лінія – але мінулым летам у нас была чырвоная лінія па HIMARS [рэактыўныя сістэмы залпавага агню], і яна ссунулася. Потым гэта былі баявыя танкі, і гэта таксама рухаецца», – растлумачыў ён.
У сваю чаргу дарадца міністра абароны Украіны Юры Сак у размове з журналістамі адзначыў, што Украіну таксама цікавяць пастаўкі знішчальнікаў F-15 і іншых амерыканскіх самалётаў.
Белы дом маўчыць, вытворца адказвае
Пакуль кіраўніцтва ЗША ўстрымліваецца ад заяў з гэтай нагоды, у дыскусію ўступіла кіраўніцтва кампаніі Lockheed Martin – вытворца знішчальнікаў F-16. Financial Times са спасылкай на аперацыйнага дырэктара кампаніі Фрэнка Сэнт-Джона, паведамляе, што Lockheed Martin не прымае непасрэднага ўдзелу ў перамовах аб магчымай пастаўцы ваенных самалётаў Кіеву. Аднак у кампаніі ўжо абмяркоўвалі варыянт рээкспарту F-16 ва Украіну з трэціх краін.
Але нават у гэтым выпадку спатрэбіцца дазвол ЗША на перадачу самалётаў Украіне. Акрамя таго, краінам, якія пагодзяцца адправіць знішчальнікі Кіеву, самім спатрэбіцца дапамога Вашынгтона і новыя F-16. Так, перадаваць знішчальнікі Украіне ўжо адмовіўся канцлер Нямеччыны Олаф Шольц, піша FT.
Чаго чакаць?
Па словах ваеннага даследчыка Conflict Intelligence Team Кірыла Міхайлава, нават калі амерыканскія ўлады ўсё ж такі вырашаць адправіць Украіне знішчальнікі, працэс будзе не хуткім.
«Самалёты заўсёды былі каменем спатыкнення. Успомніць хаця б тую ж гісторыю з доўгімі пастаўкамі Міг-29. Вядома, хацелася б памыляцца, улічваючы, што ў апошні час пастаўкі ідуць неяк зусім па-іншаму, хуткімі ўзгадненнямі», – растлумачыў ён.
Але нават у тым выпадку, калі Кіеў хутка атрымае неабходныя знішчальнікі, спатрэбіцца яшчэ «некалькі месяцаў, як мінімум», каб навучыць украінскіх ваенных лётчыкаў імі карыстацца.
«Ну і, вядома, складана знайсці краіну, якая пагодзіцца развітацца са сваімі F-16, таму што хутка іх не заменяць. І іх павінна быць нейкая дастатковая колькасць, каб яны рэальна мянялі сітуацыю на фронце», – адзначыў Міхайлаў.
Па класе F-16 будуць прыкладна адпавядаць расейскім вайсковым самалётам, у адрозненне ад састарэлых мадэляў, якія зараз ёсць на ўзбраенні ў Украіны. Акрамя таго, F-16 могуць несці высокадакладныя сродкі агнявой паразы, напрыклад, якія карэктуюць авіябомбы або ракеты.
«Гэта сапраўды павінна змяніць сітуацыю пры ўмове, што іх будзе дастаткова, пры ўмове, што будзе наладжана нармальнае абслугоўванне і пры ўмове, вядома, што расейцы не будуць наносіць па іх удары якія-небудзь сваімі ракетамі тыпу «Кінжала», якія ўкраінцы перахопліваць не могуць. Але ведаючы ўвогуле эфектыўнасць расейскай разведкі, я б сумняваўся ў тым, што яны змогуць паспяхова атакаваць нейкія падобныя самалёты. Калі падсумаваць, хутка гэта ўсё не адбудзецца, але пры дастатковай колькасці і наяўнасці дастатковай базы для забеспячэння, рамонту і гэтак далей, яны могуць вельмі сурʼёзна дапамагчы Украіне », – сказаў на заканчэнне эксперт.
Іншыя Навіны
«Ён яшчэ доўга будзе знаходзіцца ў закладніках». Журналісту Сяргею Сацуку споўнілася 56 галоў — у калоніі
Апошняе расследаванне Сацука было прысвечана карупцыі ў Міністэрстве аховы здароўя.
«Развіццё беларускай музыкі ў выхадзе з беларускага гета». Папа Бо ў гасцях у Чалага
Сяргей Чалы пагаварыў з дыджэем і рэжысёрам пра музыку пратэсту, песню пра Саню і спадчыну заводу «Гарызонт».
