Кантэкст: Вільня папярэдзіла Менск, што ў выпадку працягу атак метэазондамі з кантрабанднымі цыгарэтамі Латвія і Эстонія праявяць салідарнасць з Літвой. Некаторыя медыі расцанілі гэта як гатовасць зачыніць мяжу з Беларуссю, хоць Эстонія не мае з ёй агульнай мяжы.
Калі Латвія зачыніць мяжу з Беларуссю, і без таго складаная эканамічная сітуацыя ў краіне пагоршыцца, заявіла вядоўца СТБ Вольга Коршун у праграме «Тыдзень» 16 лістапада 2025 года, і прывяла прыклады росту цэн у суседзяў:
«Латвія на знак салідарнасці з Літвой пагражае таксама зачыніць мяжу. Ну, як гэта адаб'ецца на простых латвійцах, Рыга пра гэта, пэўна што, не думае. Ну, стабільнасці дакладна не дадасца. Хоць у прыбалтыйскай рэспубліцы і без таго расце інфляцыя, а з ёй і цэны. Паводле дадзеных Цэнтральнага статыстычнага кіравання краіны, больш за ўсё падаражэлі кава, ялавічына і яйкі. Кошт гэтых тавараў вырас на 35%, 28% і 21% адпаведна».
У Латвіі за апошні год сапраўды выраслі цэны — на 5,6%. Больш за ўсё падаражэлі прадукты харчавання і безалкагольныя напоі. У лідарах, як і сказала вядоўца СТБ, — кава, ялавічына, яйкі. Апроч гэтага — шакалад і алей. Аднак Коршун змаўчала, што ў Беларусі ў той жа час цэны раслі хутчэй, чым у Латвіі, на 75%. У кастрычніку 2025-га прадуктовая гадавая інфляцыя склала 9,8%. І ў нас спіс прадуктаў, якія падаражэлі больш чым на 20%, шырэй, чым у суседзяў. У ім каля двух дзясяткаў пазіцый.
Напрыклад, цана на какава-парашок вырасла амаль удвая. Яблыкі, агуркі і кава падаражэлі прыкладна ў паўтара разу. Тая ж кава ў Беларусі падаражэла мацней, чым у Латвіі. На траціну сталі даражэй шакалад, цукеркі і кукурузныя камячкі. На чвэрць — гарох, фасоля, рыба марожаная, сыр плаўлены і мёд. Трохі больш чым на 20% падаражэлі ікра, памідоры і чыпсы.