Пра тое, як «сярод белага дня нямецкі пенсіянер рыецца ў сметніцы», у праграме «Акцэнты» на «РТР-Беларусь» распавялі 20 кастрычніка 2024 года.
«Сацыяльная справядлівасць — гэта калі ўсе роўныя або адрозненні максімальна згладжваюцца. Калі параўнаць з пенсійнымі грантамі ў еўрапейскіх краінах, у той жа Нямеччыне, карэнныя жыхары могуць разлічваць на выплаты ад €1000 і вышэй. А вось мігранты ад такіх чэкаў далёкія, хоць кошт прадуктаў і камуналкі для ўсіх аднолькавы. Якія замежнікі прыязджаюць сустракаць пенсію ў Беларусі і чаму?» — падвёў вядоўца праграмы Уладзіслаў Бондар да відэасюжэту на гэтую тэму.
У Нямеччыне сярэдняя пенсія па ўзросце ў кастрычніку 2024 года — больш за €1200. У Беларусі ў пяць разоў менш — прыкладна €240.
Нямецкі пенсіянер можа працаваць і атрымліваць выплаты ў поўным памеры. У Беларусі працуючым пенсіянерам абмяжоўваюць памер пенсіі, калі іх індывідуальны каэфіцыент перавышае 1,3 — то бок заробак, з якога ім налічвалі пенсію, быў на 30% вышэйшы за сярэдні па краіне. Гэтую норму прынялі ў 1992 годзе. І толькі ў сярэдзіне кастрычніка 2024-га загаварылі пра яе адмену.
У Нямеччыне існуе пенсія ўдавы, калі пенсіянер можа атрымліваць частку выплат, якія належылі памерлай жонцы ці мужу. У Беларусі такога няма.
Нават калі чалавек ніколі не працаваў, у Нямеччыне ў старасці ён можа разлічваць на базавае забеспячэнне. Яго памер вызначаюць індывідуальна, так, каб чалавек змог аплаціць асноўныя выдаткі на пражыванне, ацяпленне, страхаванне здароўя і іншыя патрэбы. На базавае забеспячэнне могуць прэтэндаваць усе, чые даходы менш €924 на месяц.
У Беларусі без працоўнага стажу можна атрымаць сацыяльную пенсію па ўзросце, якая на момант выхаду публікацыі складае каля 210 рублёў або €60.