«Мы ў прынцыпе сёння можам ганарыцца гэтымі рэчамі. Для краіны з насельніцтвам 10 млн. чалавек… Ну давайце, Аўстрыя, аналагічная краіна. І давайце проста назавем, хто з вас ведае аналагічныя вытворчасці ў Аўстрыі. Хто з вас назаве гэтыя вось рэчы?»

Для даведкі Аўстрыя вырабляе ўзбраенне, мае свае спадарожнікі ў космасе і нават пабудавала АЭС. ВУП на душу насельніцтва па парытэту пакупніцкай здольнасці прыкладна ў 3 разы вышэй, чым у Беларусі.

У Аўстрыі на прамысловасць прыпадае 26% ад ВУП. У Беларусі – 32%. Але, калі зірнуць на рэйтынг канкурэнтаздольнасці прамысловасці, то Аўстрыя ў гэтым рэйтынгу знаходзіцца на 14-м месцы, а Беларусь – толькі на 46-м.

Многія вядомыя аўстрыйскія вытворцы (кампанія Rauch, якая робіць сокі «Хэпі дэй» і напоі «Рэд бул», напрыклад, або вытворца крышталяў Свароўскі) – гэта кампаніі з мільярднымі абаротамі.

У рэйтынгу лідэраў таксама менш вядомыя, але не менш паспяховыя вытворцы кардона і паперы, паўправадніковых тэхналогій, сталеліцейная вытворчасць з абаротам у 15 млрд еўра, на якім працуе 50 тысяч чалавек.

Яшчэ для параўнання: у Аўстрыі ёсць і ўласны вытворца сельгастэхнікі Pöttinger, ён прадае сваю прадукцыю на 500 млн еўра за год, пры гэтым там працуе ўсяго 2 тысячы супрацоўнікаў. А ў нашага Гомсельмаша працуе ажно 7 тысяч супрацоўнікаў, але абарот завода — у два разы меншы, чым у аўстрыйцаў.

У Беларусі больш гуманна ставяцца да зняволеных, чым у Еўропе

Беларусь так гуманна ставіцца да зняволеных, што Еўропе варта было б павучыцца ў яе гэтаму. Гэта заявіў дэпутат парламента Сяргей Клішэвіч у эфіры «Беларусь-1». Размова ішла аб прыняцці закона аб амністыі ў гонар Дня народнага адзінства.

«Гэта нашая нацыянальная традыцыя гуманізму. Дарэчы, закладзеная ў перыяд Савецкага саюза. Ні ў адной еўрапейскай дзяржаве такіх традыцый няма. Там у некаторых краінах, такія як у ЗША, людзі сядзяць не ведаюць ні па якіх артыкулах, ні колькі ім там далечы. Ніхто там не турбуе, ні адукацыя іхняя, ні медыцына, ні чаго іншага. У іх адно пытанне — змяншэнне затрат на ўтрыманне зняволеных у сябе ў гэтых турмах. У нас натуральна зусім іншы падыход». 

Гэта не праўда. У той жа Францыі была штогадовая традыцыя масавай амністыі зняволеных на Дзень узяцця Бастыліі. Яна існавала з 1958 года, пакуль яе не адмяніў у 2007 годзе прэзідэнт Нікаля Сарказі. Цяпер там амністуюць толькі ў парадку выключэння і індывідуальна. Цяпер там амністуюць індывідуальна.

Цяпер масавыя амністыі і памілаванні ў Еўропе сапраўды рэдкасць — іх замяняюць звычайнымі працэдурамі датэрміновага або ўмоўна-датэрміновага вызвалення.

Так што сцвярджэнне, што гуманізм еўрапейцам чужы — гэта не праўда. Узяць хоць бы каранавірус. Каб прадухіліць яго распаўсюд, у 2020 годзе ў многіх краінах зняволеных або вызвалялі датэрмінова або пераводзілі пад хатні арышт, а новым асуджаным прадастаўлялі адтэрміноўку.

Толькі з сакавіка па верасень 2020 года ў Еўропе вызвалілі каля 143 тысяч зняволеных, больш за ўсё ў Турцыі — 114 тысяч, у Францыі стала на 13,5 тысяч зняволеных менш. 

А ў Беларусі ў 2020 годзе каранавіруса нібыта не было, праўда, амністыя была. У гонар 75-годдзя вызвалення ад фашызму на волю выйшлі 2,5 тысячы чалавек, яшчэ больш за 4 тысячы атрымалі скарачэнні тэрмінаў зняволення.

Але самае галоўнае, што трэба ведаць пра беларускі гуманізм, гэта вось што. Калі палічыць, колькі ў краіне даводзіцца зняволеных на 100 тысяч насельніцтва, то ў Польшчы іх 190, у Літве — 184, у Італіі і Аўстрыя — 91, у Фінляндыі — 50. А ў Беларусі гэты паказчык складае ажно 345 чалавек на 100 тысяч насельніцтва.

Пры гэтым для аб'ектыўнасці варта сказаць, што ў ЗША на 100 тысяч насельніцтва сядзяць прыкладна ўдвая больш зняволеных, чым у Беларусі. Але мы зараз не будзем паглыбляцца ў культурныя тонкасці і ўмовы зняволення ў Амерыцы і Беларусі, паколькі Клішэвіч казаў менавіта пра Еўропу.

Украінцы вінавацяць у блэкаўтах Зяленскага, а не Расею

Расейскія і беларускія СМІ сцвярджаюць, што ўкраінцы, якія зараз сядзяць без электрычнасці пасля бамбёжак Расіі, вінавацяць у гэтым Уладзіміра Зяленскага, а не Расію. І патрабуюць ягонай адстаўкі. У прыватнасці, пра гэта пісаў беларускі тэлеграм-канал "ЖС Premium".

«У Twitter украінцы запусцілі флэшмоб з хэштэгам #LightOnZelenskyyOff. Так яны пратэстуюць супраць палітыкі Зяленскага і заклікаюць пакінуць ім сьвятло ўключаным. Банкавай лепш капітуляваць перад Расеяй». 

У доказ тэлеграм-канал апублікаваў скрыны твітаў пратэстуючых у сетцы ўкраінцаў, у якіх яны выкладваюць свае фота з выключальнікамі. 

Аднак, у рэчаіснасці аказалася, што два акаўнты, якія паказваюць «Жоўтыя Слівы», зарэгістраваны ў Твітары ў красавіку 2022 года, і за ўвесь гэты час адзіныя ўласныя допісы, якія апублікавалі гэтыя акаўнты, гэта вось гэты нібыта ўкраінскі флэшмоб супраць Зяленскага, з хэштэгамі «Уходя уходи» і «Переходжу на світлий бік».

У астатніх удзельнікаў гэтага флэшмобу твіт пад хэштэгам пра дрэннага Зяленскага ў многіх увогуле першы і адзіны. Напрыклад, вось і вось. 

Характэрна таксама, што гэтыя акаўнты зарэгістраваліся ў сацыяльнай сетцы літаральна пару месяцаў таму.

Сярод іх бываюць і старыя акаўнты - па 6 гадоў у твітэры. Але за ўвесь гэты час у акаўнце нібыта жыхара Адэсы заклік падтрымаць флэшмоб - толькі другі твіт. 

Некаторыя людзі, якія пісалі твіты пад гэтым хэштэгам і нібыта ўдзельнічалі ў флэшмобе, аказаліся жартаўнікамі, якія падхапілі яго дзеля сцёбу. 

Вось, напрыклад, карыстач сам напісаў у каментарах, што ён такім чынам пажартаваў, а яго гумар не зразумелі.

Увогуле, нам так і не ўдалося знайсці ў Твітары рэальныя жывыя акаўнты тых, хто б шчыра падтрымаў флэшмоб. Падобна, што ўся гэтая гісторыя - падробка ў выкананні робатаў.