Аб супрацы з польскай партыяй «Фронт» і дапамозе, прапанаванай палякам, Алег Гайдукевіч, дэпутат беларускага парламенту і лідар Ліберальна-дэмакратычнай партыі Беларусі 2 кастрычніка 2024 года казаў у эфіры «Радыё Менск».
«Хтосьці пытаецца: для чаго мы супрацоўнічаем? Вось мы робім нейкую заяву. Я прапанаваў, напрыклад, на поўным сур'ёзе. У іх жа паводка была. І прыбярыце войскі з мяжы, адпраўце змагацца з паводкай. А мы самі за вас мяжу паахоўваем. Звярніцеся да нашага прэзідэнта, ён не адмовіць. Бедства ж у вас. Не жадаеце нашую дапамогу? Мы ж людзям заўсёды дапамагаем. Прыбярыце войскі, мы свае. Лідар партыі “Фронт", я адправіў відэазварот, ва ўсе СМІ, надрукавалі. Хіба дрэнна, што палякі даведаюцца праўду пра Беларусь?» — задаўся пытаннем дэпутат.
Партыя «Фронт» (Front) у Польшчы лічыцца прарасейскай і прабеларускай, у парламенцкіх выбарах яна не ўдзельнічала. Узначальвае яе былы актывіст партыі «Права і справядлівасць» (Prawo i Sprawiedliwość, PiS), экс-дэпутат парламенту і ў мінулым намеснік міністра Дзяржаўнага казначэйства Кшыштаф Талвінскі (Krzysztof Tołwiński).
Зварот Алега Гайдукевіча апублікавалі на сайце гэтай партыі
«Мы перажываем, што ў нашых суседзяў паводка, гора, і лічым, што ўся тэхніка, узброеныя сілы і нават залішняя колькасць памежнікаў павінны цяпер накіроўвацца на дапамогу людзям. А беларусы справяцца з аховай мяжы. Больш за тое, мы можам ліквідаваць чэргі, паказаць, як трэба працаваць».
У паведамленні да відэа ад імя партыі «Фронт» напісана, што Гайдукевіч запісаў зварот і да польскіх, і да беларускіх уладаў. А звярнуцца да апошніх па дапамогу яго папрасіла сама партыя «Фронт».
У польскіх медыях інфармацыі пра зварот Алега Гайдукевіча каманда WTF не знайшла. Пра партыю ЛДПБ апошнім разам медыі суседняй краіны ўзгадвалі яшчэ да паводкі, распавядаючы пра падпісанне пагаднення аб супрацы з «Фронтам».