Дата з'яўлення фэйка: 08.05.2024
Праўладныя беларускія медыі паведамілі, што на нацыянальным сімвале Нямеччыны і самай вядомай славутасці Берліна — Брандэнбургскай браме — у ноч на 8 траўня з'явіліся серп і молат на чырвоным фоне. Каманда Weekly Top Fake праверыла, ці праўда гэта.
Пост пра з'яўленне савецкай сімволікі на Брандэнбургскай браме 8 траўня 2024 года апублікаваў тэлеграм-канал «Менская праўда». Тэкст суправадзілі фотаздымкамі і відэа, на якіх бачная славутасць, падсветленая чырвоным колерам, з сярпом і молатам на калонах.
«Як пішуць СМІ, магчыма, хтосьці ўзламаў праекцыю», — напісалі аўтары поста.
Мы не знайшлі такую навіну ў нямецкамоўных СМІ і звярнуліся ў паліцыю Берліна.
«Паводле ацэнкі ўсёй інфармацыі, якая маецца ў распараджэнні берлінскай паліцыі, відэа і фотаздымкі меркаванай праекцыі на Брандэнбургскай браме, якія распаўсюджваюцца ў сацыяльных сетках, з'яўляюцца аптычнай/графічнай падробкай», — адказалі нам.