На момант публікацыі ў расейскіх рэгіёнах працуюць або будуюцца пяць заводаў «Амкадор». На прадпрыемстве «Амкадор-Бранск» вырабляюць дарожна-будаўнічую, камунальную, сельскагаспадарчую тэхніку. На «Амкадор-Анега» у Петразаводску (Карэлія) – лесанарыхтоўчыя камбайны (харвестэры) і машыны для пагрузкі і транспарціроўкі лесу (фарвардэры). Ва Уфе (Башкартастан) заканчваецца будаўніцтва заводу сельгасабсталявання для апрацоўкі збожжа «Амкадор-Агідэль». У 40 км ад Санкт-Пецярбургу будуюць завод «Эксам» па вытворчасці камунальнай і сельгастэхнікі. У Ліпецку ствараюць машынабудаўнічы кластар «Амкадор-ЛТЗ» са спецыялізацыяй па выпуску трактароў.

Дырэктары гэтых заводаў – акрамя бранскага – беларусы. «Амкадор-Агідэль» узначальвае былы памочнік Лукашэнкі па Менску і да 2019 года кіраўнік Менскага трактарнага заводу Фёдар Дамаценка. «Эксам» – былы супрацоўнік аддзялення беларускай амбасады ў Санкт-Пецярбургу Ігар Заламай.

Усе гэтыя прадпрыемствы атрымліваюць дзяржпадтрымку ў Расеі: працуюць на льготных умовах крэдытавання або атрымання зямлі, уваходзяць у асаблівыя эканамічныя зоны.

У ліпені 2023-га на 13-й Міжнароднай прамысловай выставе «Інапрам» у Екацярынбурзе Аляксандр Шакуцін распавёў аб дасягненнях «Амкадора» на расейскім рынку ў 2022 годзе і падзяліўся амбітнымі планамі на 2023-й.

«Па выніках мінулага года мы занялі каля 10 працэнтаў рынку Расеі і Беларусі, у бягучым годзе наша задача павялічыць долю да 50 працэнтаў».

Пашыраючы ўплыў на расейскім рынку, «Амкадор» не толькі займае нішу, якая вызвалілася пасля сыходу замежных кампаній з пачаткам поўнамаштабнай вайны ва Украіне, але і паспяхова пры гэтым абыходзіць заходнія абмежаванні. А яго ўладальнік, бізнесовец з санкцыйнага спісу, нарошчвае прыбытак дзякуючы эмбарга, накладзенаму на Расею. Прыклад гэтага кампанія «Амкадор-Онего», якая збірае тэхніку з кампанентаў заходніх вытворцаў. Падрабязней пра гэта чытайце ў расследаванні «Бульдозерам па санкцыях. Як уладальнік «Амкадора» Аляксандр Шакуцін зарабляе насуперак і дзякуючы эмбарга».