Ведамства пацвярджае, што расследаванне было распачата па падазрэнні ў абходзе санкцый у дачыненні да расейскай і беларускай драўніны, якую прывозілі ў ЕЗ, выкарыстоўваючы Казахстан і Кыргызстан у якасці прыкрыцця для рэальнага паходжання прадукцыі.

«У студзені 2023 года, западозрыўшы, што ў Літоўскую Рэспубліку маглі быць увезены санкцыйныя лесаматэрыялы, Дзяржаўнае ўпраўленне па абароне правоў спажыўцоў накіравала ў Мытны дэпартамент пры Міністэрстве фінансаў запыт аб прадстаўленні спіса кампаній, якія імпартавалі лесаматэрыялы з Кыргызстану і Казахстану, каб пачаць расследаванне магчымых парушэнняў санкцый шляхам увозу лесаматэрыялаў праз пасярэднікаў. Атрымаўшы спіс кампаній, Дзяржаўнае ўпраўленне па абароне правоў спажыўцоў неадкладна пачало расследаванне, якое ў цяперашні час інтэнсіўна працягваецца», – гаворыцца ў пісьмовым каментары Дзяржаўнай службы па абароне правоў спажыўцоў.

У службе не могуць назваць канкрэтныя кампаніі. Паводле Siena, сярод кампаній, у дачыненні да якіх вядзецца расследаванне, не адна і не дзве кампаніі, чыя роля ў схемах імпарту драўніны была раскрытая ў журналісцкіх расследаваннях Siena.

«Цяпер Дзяржаўнае ўпраўленне па абароне правоў спажыўцоў мае даныя аб 95 кампаніях, якія маглі імпартаваць санкцыйную драўніну ў Літоўскую Рэспубліку. У 4 кампаніях пачаты праверкі. (...) Атрыманыя дакументы і даныя цяпер аналізуюцца», – паведамілі ў ведамстве.

Пакуль рана казаць аб тым, ці будуць сабраныя дадзеныя мець склад злачынства. Аднак у службе не выключаюць такой магчымасці.

«Калі будзе ўстаноўлена, што дзеянні, учыненыя ў правераных кампаніях, маюць прыкметы крымінальнага злачынства, матэрыялы расследавання будуць перададзены ў Генеральную пракуратуру», – гаворыцца ў каментары.

Акрамя таго, той факт, што Дзяржаўная служба па абароне правоў спажыўцоў ацэньвае дзейнасць больш за дзевяць дзясяткаў кампаній, не азначае, што ўсе яны былі ўцягнутыя ў абыход санкцый.

Нагадаем, Беларускі расследавальніцкі цэнтр выпусціў расследаванне, у якім расказаў, што некаторыя прыватныя кампаніі выкарыстоўваюць шэрыя схемы, каб пастаўляць на еўрапейскі рынак беларускую драўніну праз Казахстан і Кыргызстан. Акрамя таго, у нас ёсць дадзеныя, якія ўскосна паказваюць на тое, што холдынг «Пінскдрэў» можа быць замешаны ў шэрых схемах паставак сваёй прадукцыі ў ЕЗ. І таксама праз азіяцкія краіны.

Акрамя гэтага, у расследаванні нашых літоўскіх партнёраў з выдання Siena гаворыцца, што падсанкцыйная беларуская і расейская драўніна, забароненая для ўвозу ў краіны ЕЗ, у Літве выкарыстоўваецца ў дзяржсектары.

У пачатку красавіка ў Літве заявілі, што ўзмацненне мытнага кантролю ў краіне дало вынікі: у 2023 годзе не будзе імпарту драўніны і лесаматэрыялаў з Казахстану і Кыргызстану.