Фэйкі тыдня: Беларуская прапаганда хлусіць аб лідарстве Беларусі ў вытворчасці малочнай прадукцыі

Капуза схлусіў. Вось дадзеныя Харчовай і сельскагаспадарчай арганізацыі ААН. Як бы нам ні хацелася ўбачыць Беларусь у дзясятцы найбуйнейшых вытворцаў малака, яе там няма. Беларусь знаходзіцца на 22-м месцы ў сусветным рэйтынгу з вытворчасцю 7,5 млн. тон малака за год.

Вядоўца праграмы «Па факце: рашэнні Першага» на YouTube-канале «Белта» Алена Крылова заявіла, што Беларусь уваходзіць у ТОП-5 краін-экспарцёраў малочнай прадукцыі ў свеце. І таксама схлусіла.

Наперадзе нас у спісе ТОП-экспарцёраў яшчэ Германія, Нідэрланды, Францыя, Бельгія, Польшча і Ірландыя. Такім чынам, атрымліваецца, што Беларусь на 10 месцы і не ўваходзіць у ТОП-5.

Схлусіла Алена Крылова і пра статыстыку па вытворчасці сыра:

«Па вытворчасці сыра Беларусь знаходзіцца на чацвёртым месцы ў свеце. Былі б і на трэцім – пасля ЗША і Новай Зеландыі, але Еўразвяз у планетарнай статыстыцы чамусьці ідзе за аднаго гульца. У любым выпадку, Аўстралію і Швейцарыю ў валавой вытворчасці сыру Беларусь апярэдзіла».

У спісе найбуйнейшых вытворцаў сыру Беларусь знаходзіцца на 11-м месцы. У тройцы найбуйнейшых: Еўрапейскі Саюз, Расея і ЗША. І нават калі б Еўразвяз не ішоў за аднаго гульца, а быў падзелены па краінах, Беларусь была б яшчэ ніжэйшай у рэйтынгу. Адны толькі Італія, Нямеччына і Францыя па адзіночцы вырабляюць сыра больш, чым Расея. Так што Беларусь яны адсунулі б на 18-е месца.

Адзіны рэйтынг, звязаны з сырам, дзе Беларусь, сапраўды, можна ўбачыць на чацвёртым месцы – гэта рэйтынг экспарту сыру. І гэта толькі пры ўмове, калі Еўразвяз зноў лічыць за аднаго гульца. Тады пасля Еўразвязу, ЗША і Новай Зеландыі ў спісе будзе ісці Беларусь. Ёй належыць крыху больш за 3% ад сусветнага экспарту. Ну, а калі параўноўваць краіны, то ў Беларусі толькі 9-е месца.