Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Нашыя журналісты атрымалі прэмію Ганса Штайгэра за журналісцкія расследаванні ад Міжнароднага цэнтру журналістаў (ICFJ), прэмію за свабодныя СМІ (Free Media Award) ад фондаў ZEIT-Stiftung Bucerius і Fritt Ord, а таксама прэмію за дасягненні ў журналістыцы дадзеных (Data Journalism Award) ад Грамадства садзейнічання развіццю працоўнай дзейнасці журналістаў і рэдакцыі (SABEW). Наш праект Dubai Unlocked увайшоў «у шорт-ліст» Sigma Awards.
З 2018 па 2026 год нашыя журналісты таксама атрымалі 11 узнагародаў беларускай нацыянальнай прэміі «Вольнае слова».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
Кожны дзясяты трактар у свеце — беларускі? Палічылі, у колькі разоў з нагоды дня народзінаў Лукашэнкі перабольшылі гэтую лічбу
«Беларуская тэхніка, як і швейцарская, — гэта сусветны брэнд. Прыкладна кожны дзясяты трактар на планеце — гэта трактар "Беларус"»
У свеце 10% трактароў — беларускай вытворчасці. Такое дасягненне ў гонар дня народзінаў Аляксандра Лукашэнкі агучылі на тэлеканале КПРФ «Красная линия». Каманда Weekly Top Fake высветліла, што ў ліку памылка — ён меншы мінімум у шэсць разоў.
Пра кожны дзясяты беларускі трактар гаворка ішла ў эфіры тэлеканалу КПРФ «Красная линия» 28 жніўня 2024 года.
«Калі я ўбачыў бацьку за стырном, за штурвалам камбайна, які яны стварылі... А кожны дзясяты трактар у свеце беларускі», — агучыў лічбу доктар філасофскіх навук Валянцін Карасёў.
Такі ж паказнік 20 жніўня 2024 года назваў галоўны рэдактар газеты «Менскі кур'ер» Кірыл Казакоў у праграме «Азаронак. Наўпрост»:
«Вось гэтая вось дыпламатыя трактара, якая працуе ва ўсім свеце... 10% трактароў свету робіцца ў Беларусі».
Гучала гэтая колькасць і ў эфіры СТБ у 2016 годзе:
«Беларуская тэхніка, як і швейцарская, — гэта сусветны брэнд. Прыкладна кожны дзясяты трактар на планеце — гэта трактар "Беларус"».
Спікеры, якія гаварылі пра гэта, не ўдакладнялі, сярод якіх трактароў «Беларус» — кожны дзясяты: сярод сельскагаспадарчых, колавых або ўсіх відаў.
У 2023 годзе ва ўсім свеце, паводле дадзеных Італьянскай нацыянальнай федэрацыі вытворцаў сельскагаспадарчай тэхнікі, прадалі 2,2 млн сельскагаспадарчых трактароў. МТЗ адсправаздачыўся, што за гэты ж перыяд вырабіў 34 тысячы трактароў. Значыць, нават калі дапусціць, што колькасць прададзеных супадае з колькасцю вырабленых трактароў у свеце, то беларускім быў прыкладна кожны 67 ці прыблізна 1,5% трактароў.
