Новае

Фэйкі тыдня: беларусы з 2015 года сталі багацейшымі на 20% – Шпакоўскі

Беларусы не бяднеюць, і з 2015 года іх даходы выраслі на 20%. Такі аргумент прывёў прапагандыст Аляксандр Шпакоўскі ў гутарцы з супрацоўнікам газеты «Менская праўда». Той спытаўся ў яго парады, як змагацца з хлуснёй падчас інфармацыйнай вайны.

«Калі кажуць, што народ бяднее, трэба ўказваць, што гэта не зусім так. ВУП па парытэце пакупніцкай здольнасці на душу насельніцтва з 2015 года вырас на 20% і дасягнуў 22 тысяч долараў у пераліку на чалавека», – заявіў Шпакоўскі.

Сапраўды, ВУП Беларусі на душу насельніцтва, разлічаны па парытэту пакупніцкай здольнасці – гэта значыць з улікам узроўню спажывецкіх коштаў – летась склаў $21.600 долараў на чалавека. І з 2015 года ён вырас на 20%.

Але гэта не ўся праўда. Гэта самы маленькі паказнік росту на постсавецкай прасторы, за выключэннем Азербайджану. У Казахстане за гэты ж перыяд ВУП па парытэту пакупніцкай здольнасці вырас на 23% і склаў 28 тысяч 600 долараў – больш, чым у Беларусі.

Напрыклад, у Расеі паказнік вырас на 36%, у Малдове на 69%, Літве – на 48%, і нават ва Украіне – на 39%.

Больш за тое, Аляксандр Шпакоўскі нездарма ўзяў за аснову 2015 год, бо на піку росту Беларусь была ў 2014 годзе, а ў 2015 ужо пачаўся спад. А па паказніку ВУП на душу насельніцтва Беларусь да гэтага часу не вярнулася на ўзровень дакрызіснага 2014 года.