Украінскі бізнесовец Сяргей Семянюк падаў у суд на журналістаў «Слідство.Інфо». У расследаванні выдання яго назвалі сябрам і партнёрам Эдуарда Апсіта, прадпрымальніка з беларускім і расейскім грамадзянствамі. Пасля анексіі Крыму ён дзяліў рынак ваеннага клінінгу з заснавальнікам ПВК «Вагнэр» Яўгенам Прыгожыным. Застаючыся партнёрам Апсіта, Семянюк прыбіраў стратэгічныя ўкраінскія абʼекты, гаворыцца ў матэрыяле, які «Слідство.Інфо» падрыхтавала ў партнёрстве з БРЦ і OCCRP.

Сяргей Семянюк падаў пазоў аб абароне гонару, годнасці і дзелавой рэпутацыі супраць рэдакцыі «Слідство.Інфо» і аўтаркі матэрыялу Яніны Карніенкі. Ён адмаўляе, што Эдуард Апсіт мае дачыненне да ягоных бізнесаў. Але, як высветлілі журналісты БРЦ, украінскі бізнесмен з 2014 года кіруе «Групай кампаній "Фасілікам"», бенефіцыярам якой зʼяўляецца Ганна Апсіт, дачка Эдуарда і Алены Апсіт. Уладальнікам яна стала ў ліпені 2023 года, да гэтага сярод уласнікаў кампаніі ў розны час значыліся яе бацька і маці. [*][*]

Семянюк і Апсіт доўгі час былі дзелавымі партнёрамі: па дакументах, якія ёсць у распараджэнні БРЦ, як мінімум з 2009 па 2019 год. У гэты ж час расейская кампанія «Флагман Клін», дзе працавалі супрацоўнікі Апсітаў, мыла казармы ў акупаваным Крыме. Пры гэтым у дагаворы, які «Флагман Клін» падпісаў з расейскім Мінабароны, у рэквізітах былі пазначаны тэлефон і паштовая скрыня кампаніі Апсітаў – расейскага «Фасілікома». [*][*]

Адвакаты Сяргея Семянюка спрабавалі маніпуляваць працэдурай электроннага размеркавання суддзяў, некалькі разоў падаючы заяву і забіраючы яе, пакуль сістэма не выдала «патрэбную» суддзю, лічаць нашыя ўкраінскія калегі. Падазрона выглядае і адказчык па справе Уладзіслаў Грындак, кажа Аляксандр Ярашэвіч, аўтар расследавання БРЦ пра Эдуарда Апсіту. Па дадзеных «Слідства.Інфа», Грындак – невядомы журналістам раней мужчына, які падзяліўся расследаваннем пра Апсіта ва інстаграм-акаўнце, створаным праз месяц пасля публікацыі. На момант выхаду навіны ў яго 33 падпісчыкі і дзве пасады. Таксама насцярожвае спроба разгледзець справу завочна. [*][*][*]

БРЦ спадзяецца, што ўкраінскія ўлады не дапусцяць маніпуляцыі пры разглядзе гэтай справы ў судзе і зробяць усё магчымае, каб абараніць свабоду слова і права журналістаў на незалежнае расследаванне карупцыі і вайсковых злачынстваў.

БРЦ расследаваў дзейнасць Эдуарда Апсіта і чальцоў яго сямʼі. Падрабязней чытайце тут:

Брудны бізнес на чыстым рынку. Як беларускія клінеры зарабілі дзясяткі мільёнаў еўра ў Беларусі, Расеі і Украіне і за што іх судзяць у Латвіі

Клінінг рэпутацыі. Як замяшаны ў адмыванні дзясяткаў мільёнаў еўра бізнесовец атрымліваў падтрымку беларускіх дэмсілаў за данаты

Навіны

Украінскі бізнесовец адмаўляе сувязь з фігурантам расследавання БРЦ і ідзе ў суд