«Ад пачуцця беспакаранасці і ўсёдазволенасці ўцекачы з Украіны ўжо пачалі не толькі красці, але і забіваць тых, хто не даспадобы» – беларускае тэлебачанне сабрала фэйкі з інтэрнэту, каб запалохаць гледачоў

«У Кракаве мясцовая сям'я пусціла да сябе бежанцаў, якія нахабіліся са старту. Па рахунках плаціць яны адмовіліся, а ў кватэры па традыцыі зладзілі вэрхал. Калі гаспадары вырашылі іх выселіць, украуцекачы проста замкнуліся ў кватэры. Высялялі іх з дапамогай паліцыі і крана».

Гэтая гісторыя вядомая толькі беларускім і расейскім медыярэсурсам. У польскіх СМІ аб гэтым не пісалі. А відэа, якое тут дэманструюць як доказ, у YouTube зʼявілася больш за год таму, калі яшчэ не было ні вайны, ні бежанцаў з Украіны.

У гэтай жа праграме паведамілі яшчэ адну страшную навіну:

«У Варшаве на мясцовага жыхара напаў натоўп пʼяных бежанцаў. Мужчына заступіўся за дзяўчат, да якіх чаплялася кампанія з 3-4 маладых людзей. У выніку бойкі мужчына атрымаў некалькі нажавых раненняў і пасля памёр. Паліцыя доўгі час спрабавала схаваць, што злачынцамі, мяркуючы па паказаннях, былі ўкраінцы».

Забойства адбылося ў траўні і беларуская прэса адразу стала абвінавачваць украінцаў. Цяпер вядомыя імёны, прозвішчы і знешні выгляд меркаваных забойцаў – іх абвясцілі ў вышук.

І хоць паліцыя не называе нацыянальнасці падазраваных, ва ўсіх траіх меркаваных злачынцаў тыповыя польскія імёны.