Новае

Фэйкі тыдня: Джордж Сорас – габрэй на службе ў Гітлера?

Былы прэм'ер-міністр Украіны Мікалай Азараў распавёў у інтэрвʼю агенцтву БЕЛТА, што фінансіст і габрэй Джордж Сорас служыў Рэйху.

«І вось там стварылі кантору, якая займалася рэалізацыяй канфіскату, канфіскаванай маёмасці ў тых людзей, якія былі асуджаныя на знішчэнне. Дык вось 14 гадовы габрэй Сорас, нейкімі праўдамі-няпраўдамі патрапіў у гэтую арганізацыю і такім чынам выратаваў сабе жыццё паколькі ён не падлягаў адпраўленні ў канцлагеры. І пачаў зарабляць на гэтым першы капітал. Вядомыя фатаграфіі яго ў гэтай форме нямецкай», – заявіў Азараў.

Калі пашукаць згадванні такога фота ў інтэрнэце, то вам хутчэй за ўсё будзе выдаваць гэты здымак.

Але на фота не Джордж Сорас, а Оскар Грэнінг – бухгалтар канцлагера Асвенцім, які размяшчаўся ў Польшчы. Яго фота ёсць на афіцыйным сайце Асвенціму. Ён нарадзіўся ў 1921-м годзе і памёр у 2018-м годзе. Грэнінг быў прызнаны вінаватым у масавых забойствах і прыгавораны да 4-х гадоў турмы. І гэта ён пералічваў і сартаваў грошы, якія адбіралі ў зняволеных, а потым перасылаў іх у Берлін. Ён сам расказаў пра гэта на судзе. Менавіта яго гісторыю Мікалай Азараў прыпісаў Джорджу Сорасу.

Сам жа Сорас нарадзіўся ў 1930-м годзе, і на пачатак вайны яму было 9 гадоў, на момант яе заканчэння – 15 гадоў. Мінімальны ж узрост для ўступлення ў СС – 17 гадоў.