Нараджальнасць у Беларусі і Еўропе абмеркавалі 15 снежня 2024 года ў праграме «Галоўны эфір» на «Беларусь 1».
«У іх жа нараджальнасць значна ніжэй за ўзровень смяротнасці, нацыі паступова выміраюць, старэюць», — распавёў у сюжэце эканамічны эксперт Аляксей Кушч.
Тэму працягнуў вядоўца Яўген Белавусаў: «І на гэтым фоне нашая краіна ашаламляльна адрозніваецца. Свае праблемы, вядома, ёсць, гэтага ніхто не хавае. Але беларуская мадэль падтрымкі сям'і і стымулявання нараджальнасці сёння сябе цалкам апраўдвае. <...> У такіх умовах нараджаць не страшна, бо ў кожнай сям'і ёсць моцная апора ў выглядзе дзяржавы. А, можа, у англасаксаў у асобе Брытаніі справы лепей? Так-так, але не. Там усё як ва ўсіх. Нараджальнасць на самым нізкім узроўні за ўсю гісторыю назіранняў».
Далей гэты тэзіс пацвярджаюць каментаром блогера з Вялікай Брытаніі Крыса Уільямсана:
«У мінулым годзе ў Англіі і Уэльсе нарадзілася 591 тысяча дзяцей, гэта самы нізкі паказнік з моманту пачатку вядзення ўліку. Самы нізкі паказнік, які калі-небудзь быў зафіксаваны. Каэфіцыент нараджальнасці — 1,44».
2023 год для Англіі і Уэльса сапраўды быў чарговым антырэкордным па нараджальнасці. Гэтая праблема актуальная амаль для ўсёй Еўропы.
У Беларусі апошні раз каэфіцыент нараджальнасці публікавалі ў статыстычных справаздачах у 2019 годзе. Пяць гадоў таму паказнік дасягаў 1,38 — то бок на адну жанчыну прыходзілася менш за два дзіцяці. Гэта горшы паказнік з усіх краін Еўразійскага саюза.
Калі параўнаць звесткі Беларусі з паказнікамі ЕЗ таго ж году, у большасці краін апошняга яны вышэйшыя. З тых часоў каэфіцыент нараджальнасці ў Беларусі мог знізіцца яшчэ больш. Пра гэта сведчаць выказванні беларускіх чыноўнікаў:
«Мы маем кожны год падзенне нараджальнасці прыблізна на 10%. І ў 2019-м, і ў 2020-м, і ў 2021-м, і ў 2022-м. І ў 2023-м мы чакаем тыя ж мінус 10%», — заявіла 2 кастрычніка 2023 года намесніца дырэктара па акушэрстве і гінекалогіі РНПЦ «Маці і дзіця» Алена Гашкевіч у эфіры СТБ.
