Пост пра вайсковую падрыхтоўку школьнікаў у Польшчы аўтары тэлеграм-каналу News.by (уваходзіць у склад Белтэлерадыёкампаніі) апублікавалі 4 лістапада 2025 года. На відэа, якое да яго дадалі, падлеткі ў вайсковай форме разбіваюць намёты, практыкуюцца са зброяй, займаюцца ў лесе арыентаваннем на мясцовасці.
«Мілітарызацыя набірае звароты: зараз у Польшчы школьнікаў вучаць вайскоўцы.
Польскі рэжым зацята задзейнічае вайсковыя часткі для ідэалагічнага прамывання мазгоў і мілітарызацыі пакалення, якое падрастае. Іх сапраўдная мэта — чыстай вады ідэалагічная апрацоўка!» — сказана ў подпісы да відэа.
У Польшчы вайскоўцы сапраўды праводзяць заняткі са школьнікамі. З 6 кастрычніка 2025 года стартаваў ужо чацвёрты набор на адукацыйную праграму пад назвай Edukacja z wojskiem («Адукацыя з арміяй»). Яна ўключае тры ўрокі і скіравана на навучанне дзяцей, як дзейнічаць у надзвычайных сітуацыях, аказваць першую дапамогу, бараніцца ад дэзынфармацыі і эвакуявацца. На ўдзел у праграме школы падаюць заявы добраахвотна. Каля 200 тыс. школьнікаў у ёй ужо паўдзельнічала.
Відэа, паказанае ў посце News.by, не мае дачынення да гэтай праграмы. Яго летам 2025 года апублікавала Вайсковая сярэдняя школа імя Завішы Чорнага (Wojskowa Szkoła Średnia im. Zawiszy Czarnego) — навучальная ўстанова з вайсковым ухілам, аналаг кадэцкай вучэльні. Туды паступаюць школьнікі, якія збіраюцца звязаць сваю будучыню з арміяй, пасля сканчэння васьмі класаў звычайнай школы.
У роліку паказаныя заняткі ў платным летнім лагеры для падлеткаў, які праводзіла вайсковая школа. Там удзельнікі займаліся фізічнай і страявой падрыхтоўкай, арыентаваннем на мясцовасці і каманднай працай.
У кастрычніку 2025 года БРЦ апублікаваў расследаванне пра беларускіх дзяцей, якія наведваюць вайскова-патрыятычныя клубы, якія базуюцца ў вайсковых частках, што ўваходзяць у склад фонду «Маладая гвардыя». Падлеткі маршуюць, праходзяць агнявую і медычную падрыхтоўку, бяруць удзел у палявых лагерах.
