Уцякачка з Паўночнай Карэі распавяла пра жахі жыцця ў ЗША

Новае

Фэйкі тыдня: уцякачка з Паўночнай Карэі распавяла пра жахі жыцця ў ЗША

Бегла з Паўночнай Карэі ў Злучаныя Штаты і прыйшла ў жах ад таго, наколькі Амерыка несвабодная і таталітарная. Так вядоўца ток-шоу «Час пакажа» на расейскім Першым канале Анатоль Кузічаў паднёс гісторыю Карэянкі Ёнмі Пак, якая ў дзяцінстве, сапраўды, збегла разам з маці ў Злучаныя Штаты ад камуністычнага рэжыму.

«Дзяўчына з Паўночнай Карэі – яна вырвалася з Паўночнай Карэі. Я ўяўляю, чаго ёй гэта каштавала. Усімі праўдамі і няпраўдамі яна вырвалася адтуль – з гэтага, як яна лічыла, апраметнага пекла. І, фух, прыбыла ў Злучаныя Штаты Амерыкі. І да ўласнага жаху яна зразумела, што ў Штатах ніфіга не лепш. З пункту гледжання таталітарызму, жаху, ціску, кантролю, свабоды і гэтак далей... наогул не лепш. Гэта ні кропелькі з майго боку не перабольшанне. Так менавіта яна і сказала», – заявіў Кузічаў.

Адразу пасля гэтага вядоўца «час пакажа» прапанаваў праслухаць наступны фрагмент прамовы Ёнмі Пак:

«Я чакала, што марную свой стан, час і энергію, каб навучыцца думаць. Але яны прымушаюць вас рабіць так, як яны хочуць, каб вы думалі. Я думала, што Амерыка адрозніваецца, але я ўбачыла так шмат агульнага з тым, што бачыла ў Паўночнай Карэі, што пачала турбавацца».

На самай справе, расейскі Першы канал абрэзаў выказванне Карэянкі, змяніўшы яго сутнасць роўна наадварот. Калі паслухаць выразаны кавалак, то аказваецца, што бежанка была шакаваная не дыктатам пануючай у ЗША ідэалогіі свабоднага рынку і дэмакратыі, а залішнім, на яе думку, лібералізмам у ВНУ, якія дазваляюць некаторым прафесарам прасоўваць ідэі, якія супярэчаць амерыканскім каштоўнасцям. Гэтую частку яе выказванні апублікавала нават пракрамлёўская Lenta.ru.

«Яна таксама адзначыла, што амерыканскія студэнты і выкладчыкі не разумеюць каштоўнасці сваёй свабоды і «гуляюць з агнём», сімпатызуючы сацыялістычным і камуністычным ідэалогіям, з-за якіх загінулі мільёны людзей. «Ім не трываецца аддаць свае правы і свабоды дзяржаве. Яны ўспрымаюць гэта як належнае і не разумеюць, як цяжка дамагацца свабоды – падкрэсліла Пак Ёнмі» – напісалі на Lenta.ru.