Дэпутат Гігін расказаў, што ў Славакіі дазволілі святкаваць 9 траўня. А ці была забарона?

Пра спробы заходніх краін выкараніць памяць пра перамогу над нацыстамі дэпутат Палаты прадстаўнікоў Вадзім Гігін разважаў 2 траўня 2025 года ў эфіры «Клуба рэдактараў». Ён прывёў у прыклад Славакію:

«Што там не рабілі за гэтыя гады, каб выкараніць памяць. Летась улады проста знялі забарону на святкаванне 9 траўня. Дзясяткі тысяч людзей пайшлі». 

Каманда WTF не знайшла пацверджанняў, што ў Славакіі некалі забаранялі святкаваць 9 траўня. Дзень Перамогі над фашызмам там адзначаюць штогод, але не 9 траўня, як у Беларусі і Расеі, а 8 траўня — як у большасці еўрапейскіх краін. Гэты дзень абвешчаны выходным.

Кожны год у Браціславе 8 траўня праходзяць афіцыйныя мерапрыемствы, у тым ліку і каля мемарыялу Славін — помніка савецкім салдатам, якія загінулі пры вызваленні гораду. Імпрэзы з удзелам афіцыйных асобаў там праходзілі і ў 2022 годзе, і ў 2023-м. Летась у іх узяў удзел прэм'ер-міністр Славакіі Робэрт Фіца. Медыі паведамлялі, што ля помніка сабраліся некалькі сотняў чалавек, а не дзясяткі тысяч, як сказаў Гігін.

9 траўня жыхары Славакіі святкуюць у прыватным парадку. Ускласці кветкі да мемарыялу галоўным чынам прыходзяць прадстаўнікі рускай дыяспары ці прарасейскіх арганізацыяў. 

У 2022 годзе ў Браціславе адкрылі яшчэ адно месца памяці — помнік Невядомаму Жаўнеру.