Доналд Трамп і Уладзімір Пуцін падчас перамоваў на Алясцы 15 жніўня 2025 года абмеркавалі магчымасць вываду расейскіх войскаў з акупаваных тэрыторый Сумскай і Харкаўскай абласцей Украіны ў абмен на Данецкую і Луганскую вобласці, са спасылкай на неназваныя крыніцы паведамілі некаторыя медыі. Каментуючы гэтую навіну, Аляксандр Лукашэнка заявіў журналістам, што гэтага не магло быць. Відэа з яго развагамі апублікавала БелТА.
«Яны потым выкінулі ў СМІ, як гэта мы ўмеем таксама рабіць, выцек. Нейкую далі інфармацыю, што па тэрыторыях, там яшчэ чагосьці і гэтак далей. І я тады зразумеў, тым больш Трамп не мог пра гэта казаць. Хіба мог ён казаць пра размен гэтых тэрыторый?! Абсалютна не. Але ў СМІ ўкінулі ў амерыканскія», — распавёў Лукашэнка.
Яшчэ да сустрэчы з Пуціным на Алясцы Трамп заявіў, што пытанне абмену тэрыторыямі будзе ў парадку абмеркавання. Пасля сустрэчы ён пацвердзіў гэта ў інтэрв'ю тэлеканалу Fox News:
— Давайце на секунду вернемся да пытання Украіны і Расеі. Большасць людзей, аналізуючы сітуацыю з боку, думаюць так: <...> будуць некаторыя тэрытарыяльныя абмены, тэрыторыя Расеі стане больш, чым была раней. А Украіна адчайна хоча і мае патрэбу ў нашых захадах бяспекі, якія не будуць звязаныя з NATO. Калі б вы маглі зазірнуць у свой крыштальны шар, ці так усё скончыцца? — задаў прэзідэнту ЗША пытанне вядоўца Шон Хэніці.
— Ну, я думаю, што гэта тыя моманты, якія мы абмяркоўвалі, і тыя моманты, па якіх мы ў асноўным пагадзіліся, — адказаў Доналд Трамп.
Па выніках сустрэчы на Алясцы амерыканскі лідар правёў сустрэчу з прэзідэнтам Украіны Уладзімірам Зяленскім і еўрапейскімі палітыкамі. На ёй ён таксама планаваў падняць тэму абмену тэрыторыямі: «Мы таксама абмяркуем магчымы абмен тэрыторыямі».
