Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Журналісты БРЦ – лаўрэаты нацыянальнай прэміі «Вольнае слова» Беларускай асацыяцыі журналістаў за расследаванні ў 2018, 2019, 2020, 2021 і 2022 гадах. На «Вольным слове» у 2021 годзе каманда БРЦ атрымала першае месца ў катэгорыі «Аналітыка».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
Фэйк пра інфляцыю: Аналітык Аўдонін параўнаў паказнікі Беларусі і ЕЗ
Беларусь выконвае ўсе законы эканомікі, заявіў эксперт у эфіры «Альфа Радыё».
Аналітык Беларускага інстытуту стратэгічных даследаванняў Аляксей Аўдонін у эфіры «Альфа Радыё» заявіў, што інфляцыя ў Беларусі застаецца на нізкім узроўні, у адрозненні ад краін Еўразвязу. Аднак статыстыка гэта аспрэчвае.
Паводле дадзеных Белстату, за першыя пяць месяцаў 2025-га рэальныя прыбыткі ў Беларусі павялічыліся прыкладна на 10% у параўнанні з тым жа перыядам мінулага года. Аналітык БІСД Аляксей Аўдонін патлумачыў гэта ўзростам эканомікі і нізкай інфляцыяй.
«У нас досыць нізкі ўзровень інфляцыі ў параўнанні з іншымі краінамі. Тымі ж краінамі Еўразвязу, якія цяпер проста актыўна друкуюць грошы дый залазяць у даўгі ва ўмовах мілітарызацыі. Мы ж выконваем усе законы эканомікі», — сказаў эксперт 16 ліпеня 2025 года ў эфіры «Альфа Радыё».
Каб праверыць гэта цверджанне, журналісты праекту WTF параўналі інфляцыю ў Беларусі і краінах Еўразвязу. Апошнія падзяляюцца на зону еўра і дзяржавы, якія выкарыстоўваюць нацыянальныя валюты.
Гадавая інфляцыя ў Беларусі ў чэрвені склала 7,3%.
У зоне еўра лічбы адрозніваюцца ад краіны да краіны: ад 0,5% на Кіпры да 5,2% у Эстоніі. У сярэднім у еўразоне гадавая інфляцыя ў чэрвені 2025 года склала 2%. То бок, у тры з паловай разу ніжэй, чым у Беларусі. Апроч таго, у адрозненні ад нашай краіны, дзе інфляцыя ў параўнанні з чэрвенем мінулага гады вырасла, у зоне еўра яна мае тэндэнцыю да зніжэння.
