Пра эканоміку Лівіі аналітык БІСД Аляксей Аўдонін распавёў у эфіры «Альфа Радыё» і «СБ ТБ» 20 лютага 2020 года, разважаючы, чым Беларусі можа быць карысна супраца з гэтай афрыканскай краінай. Нагодай для абмеркавання стаў візіт лівійскай дэлегацыі на чале з галоўнакамандуючым лівійскай нацыянальнай арміяй Халіфам Хафтарам. БРЦ высветліў, што верагоднай прычынай сустрэчы было зусім не ўзаемадзеянне ў сацыяльнай і гуманітарнай сферах, як паведамлялі дзяржаўныя медыі, а ваенная супраца.
«Акурат абмяркоўвалі перад эфірам, глядзелі эканамічныя паказнікі па гэтай краіне і здзівіліся, што афіцыйная статыстыка паказвае на 2023 год тэмп ВУП 17,5%. Гэта, напэўна, найбольш высокі тэмп, які цяпер ёсць у суверэнных нацыянальных эканомік па рэгіёне. <...> Мала таго, мы глядзім па паказніках ВУП — складае $168 млрд. Гэта вельмі высокі паказнік», — адзначыў Аўдонін.
Дадзеныя, якія агучыў аналітык, утрымліваюцца ў артыкуле пра Лівію на Вікіпедыі. Аднак гэта не самая надзейная крыніца інфармацыі.
Паводле статыстыкі Афрыканскага банку развіцця, у 2023 годзе ВУП Лівіі вырас на 13%. Але такі паказнік тлумачыцца нізкай базай: годам раней ВУП знізіўся амаль на 4%. ВУП Лівіі нестабільны, таму што залежыць ад аб'ёмаў здабычы нафты — то расце, то падае.
Супрацоўнікі Міжнароднага валютнага фонду (МВФ) давалі пазітыўныя прагнозы па росце ВУП Лівіі на 2024 год — амаль 8%. Але да канца года эксперты Групы Сусветнага банку чакалі ўжо скарачэння на 3%. Адбілася блакаванне здабычы і экспарту нафты на некалькі месяцаў.
МВФ ацэньвае ВУП Лівіі ніжэй, чым Беларусі ў 1,5 разу. А паводле парытэту пакупніцкай здольнасці — у 2,5 разу ніжэй.
