Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Журналісты БРЦ – лаўрэаты нацыянальнай прэміі «Вольнае слова» Беларускай асацыяцыі журналістаў за расследаванні ў 2018, 2019, 2020, 2021 і 2022 гадах. На «Вольным слове» у 2021 годзе каманда БРЦ атрымала першае месца ў катэгорыі «Аналітыка».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
Таксама Кара-Мурза, але не той. Азаронак і Пятроўскі абмеркавалі, як расейскі палітык здрадзіў бацьку, але памыліліся чалавекам
Рыгор Азаронак і палітолаг Пётр Пятроўскі вызначылі роднасную сувязь паміж расейскім апазіцыйным палітыкам Уладзімірам Кара-Мурзой і навукоўцам-хімікам і публіцыстам СССР і Расеі Сяргеем Кара-Мурзой.
Рыгор Азаронак і палітолаг Пётр Пятроўскі вызначылі роднасную сувязь паміж расейскім апазіцыйным палітыкам Уладзімірам Кара-Мурзой і навукоўцам-хімікам і публіцыстам СССР і Расеі Сяргеем Кара-Мурзой. Таксама яны заявілі, што малодшы Кара-Мурза здрадзіў старэйшага праз свае паводзіны. Каманда Weekly Top Fake вывучыла генеалагічнае дрэва абодвух.
Расея і ЗША 1 жніўня 2024 года правялі найбуйнейшы абмен зняволенымі апошняга часу. 16 палітычных вязняў турмаў Расеі абмянялі на 10 расейцаў, асуджаных у краінах Захаду. У іх лік трапіў расейскі апазіцыйны палітык Уладзімір Кара-Мурза. У 2023 годзе яго асудзілі на 25 гадоў калоніі строгага рэжыму за нібыта распаўсюд фэйкаў пра расейскае войска.
А Рыгор Азаронак і палітолаг Пётр Пятроўскі 1 жніўня 2024 года ў эфіры «Азаронак. Наўпрост» назвалі палітыка сынам расейскага хіміка і публіцыста Сяргея Кара-Мурзы.
— Давайце пазначым: ёсць Сяргей Георгіевіч Кара-Мурза, — сказаў Азаронак.
— А гэта яго сын. А яго сын акурат здрадзіў бацьку, — дадаў палітолаг Пётр Пятроўскі.
— А Сяргей Георгіевіч — выдатны мысліцель, сацыёлаг, філосаф, — пералічыў вядоўца.
— Гэта я згодны, — сказаў на заканчэнне Пятроўскі.
— А сын Юдам апынуўся, — падсумаваў Азаронак.
— Здраднік, вядома, сын, — згадзіўся Пятроўскі.
Таксама Рыгор Азаронак 5 жніўня абмеркаваў Уладзіміра Кара-Мурзу і яго «бацьку» з палітолагам Андрэем Лазуткіным.
— Тут жа паўзгадвалі, што гэты Валодзя Кара-Мурза — ён сын Сяргея Георгіевіча Кара-Мурзы, які аўтар газеты «Заўтра», газеты «Дзень», часопіса «Наш сучаснік», — распавёў Азаронак.
Вызваленага расейскага палітыка клічуць Уладзімір Уладзіміравіч Кара-Мурза і ён не з'яўляецца сынам Сяргея Георгіевіча Кара-Мурзы. Бацьку Уладзіміра звалі Уладзімір Аляксеевіч. Ён быў вядомым журналістам у 90-х. Памёр у 2019 годзе. Палітык пісаў пра гэта ў сваіх сацсетках.
А Сяргей Георгіевіч Кара-Мурза, якога ўзгадвае Азаронак, вучоны-хімік і публіцыст — яго сваяк, стрыечны дзядзька.
