Эстонія забараніла сваёй моладзі да 21 года браць удзел у імпрэзах на тэрыторыі Беларусі і Расеі, ці гэта будзе конкурс, ці адпачынак у лагеры. Прычынай назвалі ідэалагічную зараджанасць такіх падзей. На самай жа справе Таллін асцерагаецца параўнання жыцця «у нармальных краінах» з Эстоніяй – не на карысць апошняй, заявіў палітаглядальнік БТ Яўген Горын. Гэту навіну ён абмеркаваў 17 красавіка 2025 года ў праграме «Лятучка» на «СБ ТБ» з карэспандэнткай газеты «СБ. Беларусь сёння» Людмілай Гладкай і Рыгорам Азаронкам. Азаронак у падтрымку словаў Горына прывёў у прыклад Літву, «у якой загнулася ўжо ўся інфраструктура»:
«Не забудзься, што яны нядаўна зачынілі дзіцячы санаторый, беларускі дзіцячы санаторый у Друскінінкаі, у Літве. То бок яны робяць усе для таго, каб зусім не засталося ніякага насельніцтва. Вось там тры з паловай бабулі ўжо жывуць у Латвіі гэтай няшчаснай і ў Літве».
Гаворка ідзе пра санаторый «Беларусь». І ён працягвае працаваць. У публічным рэестры літоўскіх прадпрыемстваў зафіксавана, што арганізацыя заплаціла падаткі за першыя два месяцы 2025 года. Апроч таго, ёсць дадзеныя пра памер сярэдняй зарплаты супрацоўнікаў за люты – каля €1,5 тыс. На момант публікацыі матэрыялу ў санаторыі працавала крыху больш за 180 чалавек.
На сайце «Беларусі» паказаныя цэны на сезон 2025 года. Журналістка каманды WTF патэлефанавала ў санаторый пад выглядам кліенткі і спытала, ці можна забраніраваць нумар на дваіх на шэсць начэй у траўні.
«Ёсць адзін пакой з 25 траўня. … Суткі каштуюць €190», – адказала супрацоўніца.
Санаторый знаходзіцца ва ўласнасці Беларусі і прыпыняў працу на паўгода ў 2020–2021 гадах. Тады з-за санкцый ЕЗ арганізацыі заблакавалі рахункі. На той момант «Беларусь» належала Кіраванню справамі прэзідэнта. Пазней яе перадалі Беларускаму рэспубліканскаму цэнтру грамадскага здароўя і санаторна-курортавага лячэння.
Літва з 2023 года не выдае візы грамадзянам Беларусі, таму трапіць у санаторый у Друскінінкаі стала складаней. Паводле дадзеных рэестра прадпрыемстваў, у 2020–2021 году яго выручка значна скарацілася, але ў апошнія гады нават перасягнула паказнікі 2019-га.
