Кантэкст: У верасні 2026 года Інстытут сацыялогіі Нацыянальнай акадэміі навук Беларусі прадставіў дадзеныя апытання больш як дзвюх тысяч чалавек па ўсёй краіне. Звыш 82% апытаных ацанілі сваё матэрыяльнае становішча як добрае. Пры гэтым 41% паведамілі, што трацяць усё заробленае і нічога не адкладаюць, а амаль кожнаму чацвёртаму не хапае грошай на лячэнне і лекі.
17 верасня 2026 года Уладзімір Казакоў заявіў у эфіры Першага нацыянальнага канала Беларускага радыё:
«Беларусь сёння займае 65-е месца ў свеце паводле індэкса чалавечага развіцця. Доля малазабяспечаных у нас — менш за 3,5%. Для параўнання: у суседзяў, паводле дадзеных адкрытых крыніцаў, у Латвіі — 25,6%, у Літве — 22,2%, у Польшчы — 16%».
Беларусь сапраўды займае 65-е месца паводле індэкса чалавечага развіцця. Доля малазабяспечаных, паводле дадзеных Белстату, складае каля 3,5%. Да гэтай групы адносяць людзей, у якіх на кожнага члена сям’і прыпадае менш за адзін бюджэт пражыткавага мінімуму.
Лічбы, прыведзеныя Казаковым для суседніх краінаў, падобныя да дадзеных Eurostat пра рызыку беднасці ці сацыяльнай ізаляцыі, хоць больш свежыя значэнні крыху адрозніваюцца. Але гэта іншы паказнік. Ён улічвае людзей, у якіх даход ніжэйшы за 60% медыяннага даходу па краіне, ёсць сур’ёзныя матэрыяльныя і сацыяльныя цяжкасці або ў сям’і амаль ніхто не працуе. Методыка Eurostat не супадае з той, паводле якой разлічаная беларуская доля малазабяспечаных.
Калі звярнуцца да больш блізкіх паказнікаў, лічбы для суседніх краінаў выглядаюць інакш: у Літве за рысай абсалютнай беднасці жывуць каля 7% насельніцтва, а ў Польшчы за рысай крайняй беднасці — крыху больш за 5%. Для Латвіі супастаўнага нацыянальнага паказніка абсалютнай ці крайняй беднасці мы не знайшлі. Методыкі Беларусі, Літвы і Польшчы таксама адрозніваюцца, таму і гэтыя лічбы дазваляюць параўнаць краіны толькі прыблізна. Але яны не паказваюць розніцы, якую Казакоў прадставіў слухачам.
Казакоў спаслаўся таксама на індэкс чалавечага развіцця. Паводле гэтага індэкса Латвія, Літва і Польшча апярэджваюць Беларусь: Польшча займае 35-е месца, Літва — 39-е, Латвія — 41-е, Беларусь — 65-е.
