У Беларусі з 1 верасня вырасце сярэдняя пенсія прыкладна на 5% да 980 рублёў (каля $320). Гэта ўжо другое падвышэнне сёлета. Абмяркоўваючы гэту навіну ў эфіры «Радыё-Менск», вядоўца Алёна Радоўская адзначыла, што часы, калі пенсіянерам даводзілася канцы з канцамі зводзіць, засталіся ў далёкім мінулым. Зараз беларускія пенсіянеры могуць сабе дазволіць нават падарожжы.
«Успомні, як нашы бабулі ў Савецкім Саюзе, ідучы на пенсію, так, бедненькія, гандлявалі кветачкамі. То бок была праблема, была праблема ў тым, каб выжыць на гэту пенсію, так. То бок мы бачылі замежных бабуль, якія, прабачце, тут падарожнічалі па ўсім свеце. І паглядзіце, як за 30 гадоў усё змянілася. Нашы бабулі цяпер са сваімі дзядулямі дакладна гэтак жа падарожнічаюць па свеце, вывучаюць выдатную матухну Расею. Добра, меж няма, менталітэт адзін», — расказала Радоўская ў эфіры 14 жніўня.
Статыстыкі па падарожжах беларускіх пенсіянераў няма. Аднак каманда WTF знайшла вынікі апытання Інстытута сацыялогіі НАН Беларусі сярод жыхароў пенсійнага ўзросту. У 2023 годзе на пытанне «Як вы найчасцей праводзіце вольны час?» толькі 3,3% рэспандэнтаў адказалі, што падарожнічаюць. Самым папулярным быў адказ «Гляджу тэлевізар, слухаю радыё».
Для параўнання, у Еўразвязе ў тым жа годзе амаль 40% людзей старэйшых за 65 гадоў адпраўляліся ў працяглыя падарожжы (мінімум на чатыры ночы) па сваёй краіны ці за мяжу. Лідары — нарвежцы і французы. Каля 70% з іх хоць раз на год падарожнічаюць. А найменш актыўныя пенсіянеры ў Румыніі, Балгарыі і Літве — падарожнічаюць усяго 7– 8%. Але кароткія падарожжы на адзін-два дні жыхары гэтых краін абіраюць удвая часцей за беларусаў. Калі ўлічваць падарожжы на выходныя з начлегам, то ў такія міні-падарожжы выбіраўся кожны другі еўрапейскі пенсіянер. Лічбы амаль дзесяць гадоў павольна растуць, не лічачы пандэмійныя гады.
