Колькі дзяржава выдаткоўвае на сілавікоў і сацыяльную сферу: версія Азаронка супраць рэальнасці

Высокую сацыяльную арыентаванасць Беларусі Рыгор Азаронак абмеркаваў 14 кастрычніка 2025 года з палітолагам Андрэем Лазуткіным. Вядоўца заявіў, што вялікую частку бюджэту краіна выдае на сацыяльную сферу:

«На ўсе сілавыя структуры (то бок армія, міліцыя, КДБ і ўсе на свеце) у нас $50 млн прыкладна ў бюджэце артыкул. Ну, зразумела, што ў кожным бюджэце ёсць яшчэ і закрытая частка гэтага фінансавання, але тым не менш гэта прыкладна так. На сацыялку (а гэта ўсе разам: будаванне, медыцына, адукацыя і ўсё, што звязана з сям'ёй, соцыумам, з побытам, з жыццём) у нас 80% бюджэту ідзе. 80! Велізарная-велізарная лічба».

Расходная частка рэспубліканскага бюджэту на 2025 год — амаль 50,3 млрд рублёў (прыкладна $16,2 млрд). Выходзіць, што $50 млн, якія Азаронак адвёў на сілавікоў, — гэта трохі больш за 0,3% ад яго. У рэальнасці на нацыянальную абарону бюджэт скіроўвае больш за 4,7 млрд рублёў. Яшчэ больш — 5,3 млрд рублёў — на судовую ўладу, праваахоўную дзейнасць і забеспячэнне бяспекі, куды ўваходзяць выдаткі на міліцыю, КДБ, пракуратуру і гэтак далей. Усе разам — гэта 10 млрд рублёў ці звыш $3 млрд. То бок у 60 разоў больш, чым заявіў Азаронак.

У кансалідаваным бюджэце, то бок зведзеных разам рэспубліканскім і ўсіх мясцовых бюджэтаў краіны, на абарону, бяспеку і суды адводзіцца 12,4%.

Да выдаткаў на сацыяльную сферу адносяцца траты на адукацыю, ахову здароўя, сацыяльную палітыку, фізічную культуру, спорт, культуру і медыі. На гэта агулам ідзе прыкладна 42% кансалідаванага бюджэту. Яшчэ каля 5% — выдаткі на жыллёва-камунальныя паслугі і будаванне. То бок на ўсе — 47%, а не 80%, як сцвярджае Азаронак.

Яшчэ пяць гадоў таму, у 2020-м, на абарону і бяспеку дзяржава выдаткоўвала 9,8% бюджэтных сродкаў, а на сацыяльную сферу — палову.