ЗША спынілі супрацу з краінамі Еўразвязу ў змаганні з дэзынфармацыяй, якую шыраць Расея, Кітай і Іран, паведаміла 8 верасня 2025 года выданне Financial Times са спасылкай на свае крыніцы. Абмяркоўваючы гэтую навіну праз чатыры дні ў праграме «Клуб рэдактараў» на News.by, старшыня Белтэлерадыёкампаніі Іван Эйсмант агучыў нібыта прычыну такога рашэння:
«Апынулася што 89% фэйкаў ствараліся агенцтвамі па змаганні з фэйкамі. Кангрэсу паказалі даклад, які давёў, што тысячы еўрапейскіх арганізацыяў, якія змагаліся з фэйкамі на амерыканскія грошы, самі стваралі фэйкі, каб захоўваць фінансаванне. У тым ліку гэта тычылася фэйкаў пра Расейскую Федэрацыю і Рэспубліку Беларусь».
Днём раней, 11 верасня, відэа з такой жа інфармацыяй і лагатыпам Financial Times апублікавалі аўтары тэлеграм-каналу «Шкварка News». Каманда WTF праверыла афіцыйныя старонкі брытанскага выдання ў сацсетках і не знайшла такога роліка. Па афармленні відэа адрозніваецца ад арыгінальных ролікаў Financial Times: на іх іншы шрыфт, заўсёды ёсць цітры і закадравы голас, а на апублікаваным у «Шкварка News» — толькі падрадковы тэкст.
У самым роліку паказаны Белы дом, Кангрэс і загалоўкі матэрыялаў Financial Times і The Independent пра тое, што ЗША скасавалі мемарандум па лініі Дзярждэпу. Мы праверылі: артыкулы з такімі назвамі ёсць у абодвух выданнях, але ў іх няма інфармацыі, што фэйкі ствараюць агенцтвы па змаганні з дэзынфармацыяй. Не згадваецца там і даклад пра тысячы еўрапейскіх арганізацый, што фабрыкавалі такія матэрыялы.
Прычыны спынення супрацы іншыя: рэспубліканцы ў Кангрэсе абвінавацілі Цэнтр глабальнага ўзаемадзеяння (Global Engagement Center, GEC), які займаўся супрацьдзеяннем дэзынфармацыі, у цэнзуры і абмежаванні свабоды слова ўнутры ЗША, і зачынілі яго. Дырэктар GEC Джэймс Рубін назваў гэта «аднабаковым раззбраеннем», якое паслабляе Захад у супрацьстаянні расейскай і кітайскай прапагандзе.
