Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Журналісты БРЦ – лаўрэаты нацыянальнай прэміі «Вольнае слова» Беларускай асацыяцыі журналістаў за расследаванні ў 2018, 2019, 2020, 2021 і 2022 гадах. На «Вольным слове» у 2021 годзе каманда БРЦ атрымала першае месца ў катэгорыі «Аналітыка».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
Еўропа забылася? Як «ЖС Premium» перакруціў вынікі апытання пра Беларусь і пратэстах 2020 года
Аўтары тэлеграм-канала паказалі толькі фрагмент відэа, каб пацвердзіць свае словы.
«Усё даўно выветрала з галоў» — пра беларускія пратэсты 2020 гада ніхто не помніць. Такое паведамленне апублікавалі аўтары тэлеграм-канала «ЖС Premium» і як доказ прымацавалі відэа з нарэзкай апытання жыхароў Нямеччыны. Каманда Weekly Top Fake высветліла, што не паказалі ў роліку.
Еўрапейцы не помняць пра падзеі 2020 года ў Беларусі, напісалі аўтары тэлеграм-канала «ЖС Premium» праз пяць дзён пасля гадавіны пратэстаў, якую беларуская апазіцыя адзначыла акцыямі ў розных гарадах.
«Прапагандысты ўладкавалі апытанне ў Нямеччыне: выйшлі на вуліцы, лавілі людзей у фрагмента Берлінскай сцяны, размаляванай у колеры БЧБ-пракладкі, і пыталі: "Што вы помніце пра пратэсты ў Беларусі пяцігадовай даўнасці?" Адказ быў адзін і той жа: "Мы нічога не ведаем"», — напісалі аўтары поста.
У доказ гэтых словаў прымацавалі відэа з апытаннем. Ролік апынуўся сапраўдным. Яго арыгінал 13 жніўня апублікавалі на ютуб-канале «Deutsche Welle Беларусь». Журналісты выдання пыталіся ў мінакоў у Берліне не толькі пра пратэсты 2020 года, але і што яны ўвогуле ведаюць пра Беларусь. Здымкі праходзілі на Патсдамскай, дзе ўжо пяць гадоў стаіць фрагмент Берлінскай сцяны, падораны беларускай дыяспары.
Шмат якія рэспандэнты сапраўды мала, што ведалі пра нашу краіну і падзеі пяцігадовай даўнасці. Але не ўсе. Арыгінальнае відэа доўжыцца больш за пяць хвілін, у ім есці і іншыя адказы, якія «ЖС Premium» не паказаў. Напрыклад, адна жанчына сказала:
«Там цяпер ва ўладзе дыктатар, я чула нешта падобнае. Я глядзела рэпартаж па тэлевізары, там расказвалі, што ў Беларусі ёсць жанчына, якая змагаецца за волю і зараз за гэта ў турме».
Іншы мінак адказаў: «Мы назіралі, як развіваліся пратэсты. <…> Самае апошняе, што я чуў, гэта тое, што апазіцыю ў краіне прымусілі замоўчаць. <…> Тыя падзеі паказалі, што беларусы не хочуць жыць у аўтакратыі».
