Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Нашыя журналісты атрымалі прэмію Ганса Штайгэра за журналісцкія расследаванні ад Міжнароднага цэнтру журналістаў (ICFJ), прэмію за свабодныя СМІ (Free Media Award) ад фондаў ZEIT-Stiftung Bucerius і Fritt Ord, а таксама прэмію за дасягненні ў журналістыцы дадзеных (Data Journalism Award) ад Грамадства садзейнічання развіццю працоўнай дзейнасці журналістаў і рэдакцыі (SABEW). Наш праект Dubai Unlocked увайшоў «у шорт-ліст» Sigma Awards.
З 2018 па 2026 год нашыя журналісты таксама атрымалі 11 узнагародаў беларускай нацыянальнай прэміі «Вольнае слова».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
Беларусы, якія з'ехалі з Беларусі, просяць камісію дазволіць вярнуцца? Правяраем словы Лукашэнкі
Усяго камісія атрымала 150 заяў.
Беларусы, якія пераехалі з Беларусі жыць у іншыя краіны, цяпер закідваюць камісію па вяртанні заявамі з просьбамі пусціць іх назад. Пра гэта распавёў Аляксандр Лукашэнка на сустрэчы з гарадзенцамі. Каманда Weekly Top Fake праверыла, ці так гэта ў рэчаіснасці.
Аляксандр Лукашэнка 2 красавіка 2024 года перасцярог людзей ад эміграцыі з Беларусі. Запіс выступу паказалі па АНТ.
«Вы туды пазірайце, хадзіце, глядзіце, можаце заехаць нешта купіць, але памятайце, што страціце апору і карані свае тут, — бяда. Вось ірванулі некаторыя туды, а цяпер закідалі камісію [генеральнага пракурора Андрэя] Шведа заявамі — хочам вярнуцца», — сказаў ён, выступаючы перад жыхарамі Горадні.
19 лютага 2024 года генеральны пракурор Андрэй Швед у Палаце прадстаўнікоў заявіў, што за год працы камісія па вяртанні разгледзела 37 рэальных заяў ахвотных вярнуцца. Вынік іх працы — за год на радзіму вярнуліся каля дзесяці чалавек.
Усяго камісія атрымала 150 заяў. Як патлумачыў генпракурор, у большасці з іх заяўнікі альбо не прапісалі анкетныя звесткі і не прыклалі свае дакументы, альбо проста прасілі даць тлумачэнні. А часам гэта былі лісты з пагрозамі ці не па тэме.
