«Уявіце, калі б нас злавілі на такой фальсіфікацыі», - сцвярджаў кіраўнік БТ Іван Эйсмант.
«Не, з нашага боку, з боку журналістаў, мы такіх фальсіфікацый сабе не дазваляем», - паўтараў яму кіраўнік праўладнага саюза журналістаў Андрэй Крывашэеў.
«Мы апрыёры, вось яно зашыта ў прытомнасць, паважаем свайго падпісчыка, калі гэта газета, свайго гледача, слухача на радыё. І мы не можам ім карыстацца, ім хлусіць. А там іншая філасофія», - не адставаў ад іх галоўрэд «СБ.Беларусь сегодня» Зміцер Жук.
Карацей, усё вакол хлусяць, і толькі дзяржаўныя СМІ Беларусі - гавораць праўду. Што ж, давайце паглядзім пару сюжэтаў на тэлеканале, якімі кіруе Іван Эйсмант.
Напрыклад, першы намеснік Івана Эйсманта і па сумяшчальніцтве вядучы БТ Сяргей Гусачэнка ў праграме «Зразумелая палітыка» заявіў, што рэйтынг Джо Байдэна ўпаў ніжэй за плінтус - да 21 працэнта.
«ЗША пасля Аўганістана патрэбна маленькая пераможная вайна. І гэта разумеюць ці не ўсе, акрамя самой украінскай эліты. Рэйтынг Байдэна абнавіў гістарычны мінімум - 21%».
Насамрэч рэйтынг амерыканскага прэзідэнта зараз складае 41%. Вось вынікі апошняга нацыянальнага апытання грамадскай думкі, праведзенага даследчым цэнтрам Pew Research Center з 10 па 17 студзеня 2022 года. Але Гусачэнка дазволіў сабе яго зменшыць у два разы.
А вось яшчэ адзін фэйк ад Гусачэнкі. Ён кажа, што тэлеканал CNN, той самы, які задаў Лукашэнку няправільныя пытанні, ідзе на дно, яго рэйтынгі абрынуліся.
«На працягу ўсяго года CNN антылідэр па стратах аўдыторыі сярод амерыканскіх тэлеканалаў. Рупар ліберальнай позвы проста зарэкамендаваў сябе няйначай як фабрыка фэйкаў. І сёння медыятытанік упарта ідзе на дно».
Насамрэч, Гусачэнка не дамаўляе. Заўсёды ў год выбараў рэйтынгі CNN узлятаюць, і пасля выбараў – падаюць. І зараз, нават пасля адтоку аўдыторыі пасля выбараў, канал больш папулярны, чым быў да іх. Па дадзеных даследчай кампаніі Нильсен, CNN да дна далёка.
«CNN завершыць 2021 другім па папулярнасці годам за ўсю гісторыю, пачынаючы з яго запуску ў 1980 годзе. Яго агульная аўдыторыя гледачоў саступае толькі 2020 годзе, а гэта азначае, што апошнія два гады былі двума самымі папулярнымі гадамі CNN».
Ідзем далей. У госці на перадачу «Скажы не маўчы» паклікалі акцёра і адэпта Аляксандра Лукашэнку Уладзіміра Гасцюхіна, дзе ён выказаўся пра бел-чырвона-белы сцяг.
«Ён быў першапачаткова варожы. Я ведаў, што ён вісеў на ратушы. Вось гэты вялікі вялізны сцяг, партрэт гітлера і побач свастыка. Вось гэта заўсёды, увесь час вісела».
Бел-чырвона-белы сцяг не мог вісець на ратушы побач са свастыкай падчас вайны па адной простай прычыне - ратушы падчас вайны не было. Мінская ратуша была разбурана яшчэ ў сярэдзіне 19 стагоддзя. А адноўлена толькі ў 2004-м.
А фэйк, што ў Лукашэнкі высокі рэйтынг даверу сярод украінцаў, увогуле не сыходзіць з дзяржаўных тэлеканалаў. На гэты раз яго агучыла супрацоўніца Белтэлерадыёкампаніі Марыя Петрашка, даўшы ў пацверджанне… словы трох бабуль.
А калі спытаць не ў трох бабуль, а правесці апытанне грамадскай думкі, то акажацца, што давер не такі ўжо і высокі. Вось вынікі даследавання за верасень 2021 года. Лукашэнку пазітыўна ацэньваюць 12% украінцаў, хутчэй пазітыўна яшчэ 22%. Разам 34 працэнты. А негатыўна і хутчэй негатыўна - 59%. Вось такая папулярнасць.
Дарэчы, тое, што Лукашэнка, па папулярнасці ва Украіне абышлі Дуда, Макрон, Байдэн і Меркель, дзяржСМІ таксама імкнуцца не заўважаць.
