Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Журналісты БРЦ – лаўрэаты нацыянальнай прэміі «Вольнае слова» Беларускай асацыяцыі журналістаў за расследаванні ў 2018, 2019, 2020, 2021 і 2022 гадах. На «Вольным слове» у 2021 годзе каманда БРЦ атрымала першае месца ў катэгорыі «Аналітыка».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
Берлін напампоўвае Украіну зброяй, здольнай паражаць цэлі ў глыбіні РФ? Праверылі і абверглі
У мінулым годзе Нямеччына, па словах міністра абароны ФРГ Барыса Пісторыўса, аднабакова вылучыла Кіеву дапамогу на €8 млрд.
Нямеччына напампоўвае Украіну зброяй далёкага бою для эскалацыі канфлікту з Расеяй, заявіў загадчык кафедры паліталогіі і сацыялогіі Гомельскага дзяржаўнага ўніверсітэту імя Францыска Скарыны Міхаіл Цішкевіч. Каманда Weekly Top Fake высветліла, што ўсё наадварот.
Абвінавачванні на адрас канцлера Нямеччыны Олафа Шольца ў эскалацыі расейска-ўкраінскага канфлікту прагучалі ў праграме «Наш час» на канале «Тэлерадыёкампанія "Гомель"» 5 студзеня 2025 года.
«Тое ж самае тычыцца і Нямеччыны — галоўнага каршака на еўрапейскім кантыненце. Той жа Шольц (у лютым адбудуцца выбары чарговыя) працягвае гэтую палітыку — напампоўваць зброяй Украіну для таго, каб гэты канфлікт перарос ужо ў іншую стадыю. Таму што выкарыстоўваюцца ў дадзеным выпадку пастаўкі зброі, якая здольная паражаць цэлі ў глыбіні Расейскай Федэрацыі», — заявіў загадчык кафедры паліталогіі і сацыялогіі Гомельскага дзяржаўнага ўніверсітэту імя Францыска Скарыны Міхаіл Цішкевіч.
Олаф Шольц у верасні 2024 года сказаў, што Берлін не будзе пастаўляць Кіеву высокадакладную зброю вялікай далёкасці, нават калі хаўруснікі па NATO прымуць іншае рашэнне. Хаўруснікі менавіта такое рашэнне і прынялі: акрамя ЗША дазвол на выкарыстанне свайго дальнабойнага ўзбраення далі Францыя і Вялікая Брытанія.
У мінулым годзе Нямеччына, па словах міністра абароны ФРГ Барыса Пісторыўса, аднабакова вылучыла Кіеву дапамогу на €8 млрд. У снежні 2024-га Берлін заявіў пра новую партыю зброі для Украіны, але ў ёй няма высокадакладных дальнабойных ракет.
