Каб прыцягнуць увагу Дональда Трампа і ягонай адміністрацыі да «ўкраінскага пытання», Кіеў гатовы прыняць уцекачоў з Газы, напісалі аўтары тэлеграм-каналу «Резидент» 7 лютага 2025 года. Яны спаслаліся на крыніцу ў Офісе Уладзіміра Зяленскага.
«Кіеў прапануе ініцыяваць "глабальную палестынскую ініцыятыву", у рамках якой Украіна першай пагодзіцца прыняць уцекачоў з Газы, што павінна справакаваць згоды іншых краін. Гаворка можа ісці пра 500 тысяч уцекачоў», — сказана ў посце.
Навіну падхапіла «Комсомольская правда» і іншыя расейскія медыі. А ў ТыкТоку 9 лютага і на YouTube 11 лютага з'явілася відэа пад назвай «Завоз мігрантаў ва Украіну», на якім паказаная вялікая група замежнікаў. Спасылку на яго даслалі чытачы і гледачы WTF з просьбай праверыць.
На кадрах бачная шыльда «Ласкаво просимо». Знята відэа побач з мяжой — каманда WTF вызначыла лакалізацыю дзякуючы рэкламным стэлам двух заправак. Мы знайшлі на мапе месца каля мяжы Украіны з Польшчай побач з вёскай Шэгіні паміж АЗС сетак WOG і ANP.
Журналістам таксама ўдалося знайсці іншае відэа, знятае ў гэтым месцы і, падобна, у той жа час, што і відэа, дасланае ў рэдакцыю, але з іншага ракурсу. Яго апублікавалі ў сацсетцы Х 26 лютага 2022 года. У подпісы гаворыцца, што на ім паказаныя індыйскія студэнты, якія ўжо 40 гадзін стаяць на памежным пераходзе, не маючы магчымасці пакінуць Украіну. Пра гэтую сітуацыю ў лютым 2022 года пісалі і замежныя медыі: пасля пачатку вайны сотні індыйскіх і арабскіх студэнтаў, ратуючыся ад небяспекі, затрымаліся на выездзе з Украіны ў Польшчу на пераходзе «Шэгіні — Медыка».
На АЗС, якая трапіла на відэа, можна разгледзець кошт паліва — першыя дзве лічбы падобныя да 34. Прыблізна 34 грыўні ў сярэднім каштаваў бензін у лютым 2022 года. Зараз 92 бензін у гэтай сетцы прадаюць па 53 грыўні.
