Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Нашыя журналісты атрымалі прэмію Ганса Штайгэра за журналісцкія расследаванні ад Міжнароднага цэнтру журналістаў (ICFJ), прэмію за свабодныя СМІ (Free Media Award) ад фондаў ZEIT-Stiftung Bucerius і Fritt Ord, а таксама прэмію за дасягненні ў журналістыцы дадзеных (Data Journalism Award) ад Грамадства садзейнічання развіццю працоўнай дзейнасці журналістаў і рэдакцыі (SABEW). Наш праект Dubai Unlocked увайшоў «у шорт-ліст» Sigma Awards.
З 2018 па 2026 год нашыя журналісты таксама атрымалі 11 узнагародаў беларускай нацыянальнай прэміі «Вольнае слова».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
«Радыё Менск»: У прэзідэнткі Малдовы Маі Санду няма малдаўскага грамадзянства. Правяраем, ці так гэта
Журналісты БРЦ высветлілі, пашпарты якіх краін ёсць у Маі Санду.
Прэзідэнтка Малдовы мае толькі румынскае грамадзянства, заявіла вядоўца «Радыё Менск» Алена Радоўская. Каманда Weekly Top Fake праверыла, што пра гэта кажа канстытуцыя Малдовы і сама Мая Санду.
Мая Санду 27 траўня падпісала ўказ пра наданне грамадзянства Малдовы некалькім удзельнікам рок-гурта «Бі-2». Музыканты звярнуліся за ім пасля затрымання ў Тайландзе. Па іх думцы, да пераследу быў датычны амбасадар Расеі.
У той жа дзень вядоўца Алёна Радоўская ў эфіры «Радыё Менск» заявіла, што ў самой Санду няма грамадзянства Малдовы:
«Проста варта напомніць, што ў яе дагэтуль грамадзянства Малдовы няма. Нягледзячы на яе пост, яна з'яўляецца грамадзянкай Румыніі».
Па канстытуцыі Малдовы, прэзідэнтам краіны можа стаць толькі яе грамадзянін, які дасягнуў 40 гадоў. Сама Мая Санду расказвала, што мае падвойнае грамадзянства: «Я грамадзянін Рэспублікі Малдова, у мяне два пашпарты, але маё сэрца тут».
У інтэрв'ю блогеру Юр'ю Дудзю яна прызналася, што атрымала румынскі пашпарт каля 15 гадоў назад: «У маіх бабулі і дзядулі былі румынскія пашпарты. І для мяне важна было мець румынскі пашпарт. Гэта самасвядомасць», — заявіла прэзідэнтка Малдовы.
