Аляксандр Лукашэнка 11 красавіка 2025 года заявіў, што Беларусь гатова прыняць каля 100–150 тыс. адмыслоўцаў з Пакістана з семʼямі. Пасля гэтага ў сацсетках зʼявіліся публікацыі з інфармацыяй, што мігранты ўжо пачалі масава прыязджаць у нашу краіну. Таксама карыстальнікі паведамлялі пра выпадкі гвалту з іх боку. Міністэрства ўнутраных спраў Беларусі, спрабуючы супакоіць грамадзянаў, 23 красавіка выпусціла афіцыйную заяву:
«На розных інтэрнэт-рэсурсах працягвае шырыцца фэйкавая і правакацыйная інфармацыя на тэму заезду ў Беларусь 150 тысяч грамадзянаў Пакістана. Укіды таксама ўтрымліваюць цверджанні, што пакістанцамі ўжо здзейснены шэраг злачынстваў. У гэтай сувязі МУС афіцыйна заяўляе: міграцыйныя плыні з Пакістана адсутнічаюць, роўна як і злачынствы, здзейсненыя выхадцамі з гэтай дзяржавы!»
Колькасць працоўных мігрантаў за апошнія гады ў Беларусі вырасла, аднак у лідарах не пакістанцы, а расейцы, кітайцы, туркмены і ўкраінцы. Сярод выяўленых мігрантаў, што нелегальна патрапілі ў нашу краіну, больш за ўсё афганцаў, потым ідуць сірыйцы, іранцы і індыйцы. Але сказаць, што з Пакістана міграцыйныя плыні адсутнічаюць, нельга. У сакавіку 2025 года МУС паведаміла, што ў аграмястэчку Калодзішчы пад Менскам выявілі 23 замежнікі, у тым ліку з Пакістана. Усе яны няпраўна прыехалі ў Беларусь з Расеі, скіроўваючыся ў ЕЗ. Усіх іх у выніку дэпартавалі. Летась у Калодзішчах зафіксавалі два падобныя выпадкі.
Таксама нельга сцвярджаць, што грамадзяне Пакістана не здзяйсняюць злачынстваў на тэрыторыі Беларусі. Прыкладам, у сакавіку 2025 года суд у Слуцку аштрафаваў і прысудзіў да турэмнага тэрміну двух пакістанцаў — яны вымагалі грошы ў грамадзяніна Індыі, пагражаючы забойствам і ўжываючы гвалт.
Ідэю прыцягнуць грамадзянаў Пакістана на працу абмяркоўваюць і ў Расеі. Для іх разглядаюць спрашчэнне візавага рэжыму. Пасля пачатку поўнамаштабнай вайны супраць Украіны ў РФ бракуе працаўнікоў.
Пакістан займае сёмае месца сярод краін‑крыніц мігрантаў па ўсім свеце. Бюро эміграцыі і замежнай занятасці падлічыла, што за апошнія 50 гадоў больш 10 млн грамадзянаў гэтай краіны афіцыйна пакінулі радзіму для заробку за мяжой. Сярод прычын гэтага: нястача працоўных месцаў, нізкія зарплаты, палітычная і эканамічная нестабільнасць. Апроч таго, пад канец красавіка — напачатку траўня 2025 года абвастрыўся тэрытарыяльны канфлікт з Індыяй.
