Бізнесоўцы Падляшша (памежны польскі рэгіён) скардзяцца, што церпяць страты праз закрыццё памежных пераходаў паміж Польшчай і Беларуссю. На момант выхаду нататкі з шасці працавала толькі два: адзін для пасажырскага руху, другі — для грузавога. Прадпрымальнікі запатрабавалі ад польскіх уладаў адкрыць хаця б яшчэ адзін памежны пераход. Распавядаючы пра гэта, у «Навінах» на тэлеканале СТБ 12 лютага 2025 года паказалі, як пацярпеў гандаль у Беластоку, адміністрацыйным цэнтры Падляскага ваяводства.
«Праз дзеянні польскага ўраду становішча прадпрымальнікаў без перабольшання стала бядотным. Масава зачыняюцца крамы, якія разлічаны якраз на памежны гандаль. Толькі ў Беластоку для гэтага былі пабудаваныя сем буйных супермаркетаў. Цяпер яны пустуюць. Гаспадары гандлёвых кропак не могуць аплаціць арэнду і пагасіць крэдыты, узятыя на вядзенне бізнесу. Супрацоўнікі губляюць працу», — распавяла вядоўца праграмы.
Каманда WTF устанавіла, што бязлюдныя гандлёвыя цэнтры, паказаныя на відэа, знаходзяцца не ў Беластоку. Знялі іх чатыры гады таму, падчас пандэміі каронавіруса.
Адным з ГЦ, які паказалі ў сюжэце СТБ, апынулася Galeria Bałtycka ў Гданьску. Гэты горад знаходзіцца на поўначы Польшчы, у адрозненні ад Беластоку, які знаходзіцца на ўсходзе. Арыгінал відэа апублікавалі ў інтэрнэце 20 сакавіка 2020 года. У матэрыяле СТБ кадры з яго паказаны ў люстраным адбітку.
Другі гандлёвы цэнтр, паказаны СТБ, таксама знаходзіцца ў Гданьску і называецца Forum Gdańsk. Арыгінальнае відэа, якое выкарыстаў дзяржаўны тэлеканал, таксама было апублікавана ў 2020 годзе.
Акрамя таго, журналісты WTF у пятніцу ўвечары, 21 лютага 2025 года, пабывалі ў гандлёвым цэнтры Alfa і гіпермаркеце Auchan у Беластоку. На кадрах, зробленых там, бачна, што пакупнікі ў крамах ёсць.
