Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Нашыя журналісты атрымалі прэмію Ганса Штайгэра за журналісцкія расследаванні ад Міжнароднага цэнтру журналістаў (ICFJ), прэмію за свабодныя СМІ (Free Media Award) ад фондаў ZEIT-Stiftung Bucerius і Fritt Ord, а таксама прэмію за дасягненні ў журналістыцы дадзеных (Data Journalism Award) ад Грамадства садзейнічання развіццю працоўнай дзейнасці журналістаў і рэдакцыі (SABEW). Наш праект Dubai Unlocked увайшоў «у шорт-ліст» Sigma Awards.
З 2018 па 2026 год нашыя журналісты таксама атрымалі 11 узнагародаў беларускай нацыянальнай прэміі «Вольнае слова».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
Тэлеграм-канал «Невальфовіч» выдаў рэпетыцыю парада за сцягванне тэхнікі NATO да беларускай мяжы
Ролік знялі мінімум за месяц да правядзення сумесных расейска-беларускіх вучэнняў «Захад-2025».
Аўтары тэлеграм-каналу «Невальфовіч» паведамілі, што NATO сцягвае вайсковую тэхніку да польска-беларускай мяжы. У пацверджанне яны апублікавалі відэа з бранятэхнікай. Мы спраўдзілі, дзе і калі яго знялі.
У Беларусі з 12 па 16 верасня прайшлі сумесныя расейска-беларускія вучэнні «Захад-2025». На фоне гэтай падзеі аўтары тэлеграм-каналу «Невальфовіч» 12 верасня апублікавалі відэа з танкамі і вайсковай тэхнікай, якія нібыта скіроўваюцца да польска-беларускай мяжы.
«Тэхніка NATO працягвае канцэнтравацца ля заходніх межаў Саюзнай дзяржавы. Для Захаду беларуска-расейская вучэнні толькі зручная падстава для правакацый і напампоўкі рэгіёну натаўскімі войскамі і тэхнікай. Спачатку NATO сагнала бранятэхніку і артылерыю да нашых межаў пад выглядам змагання з уцекачамі. Зараз падставай сталі планавыя беларуска-расейская вучэнні. Да таго ж скарочаныя па колькасці і адведзеныя ўглыб краіны», — напісана ў посце.
NATO сапраўды ўзмацніла абарону на ўсходнім флангу, але не праз вучэнні Расеі і Беларусі, а ў адказ на выпадкі парушэння паветранай прасторы Польшчы і атакі дронаў у ноч на 10 верасня (фэйк на гэтую тэму мы таксама выкрылі). Праз два дні прэсавая служба NATO паведаміла, што для ўмацавання мяжы задзейнічаюць авіяцыю і сродкі СПА. Пра перакідванне танкаў ці тэхнікі не згадвалася.
Каманда WTF высветліла, калі насамрэч знялі відэа, апублікаванае ў тэлеграм-канале «Невальфовіч». Яго выклалі ў TikTok 10 жніўня 2025-га з подпісам «Польская армія падчас рэпетыцыі парада 2025». Найхутчэй, на відэа рэпетыцыя парада да Дня Войска Польскага. Гэта значыць, што ролік знялі мінімум месяц таму, і гэта не можа быць рухам тэхнікі да беларускай мяжы падчас вучэнняў «Захад-2025.
