Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Журналісты БРЦ – лаўрэаты нацыянальнай прэміі «Вольнае слова» Беларускай асацыяцыі журналістаў за расследаванні ў 2018, 2019, 2020, 2021 і 2022 гадах. На «Вольным слове» у 2021 годзе каманда БРЦ атрымала першае месца ў катэгорыі «Аналітыка».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
«Зямля наша» выдала інструкцыю па карыстанні прыбіральняй за плакат для праверкі на «бандэраўшчыну»
Выкрылі фэйк пра «распрананне да бялізны» на ўкраінска-польскай мяжы.
На ўкраінска-польскай мяжы польскія памежнікі распранаюць людзей да майткоў у пошуках «наколак з бандэраўскай сімволікай», напісалі аўтары тэлеграм-каналу «Зямля наша». Спыталі ў памежнай службы Польшчы, ці праўда гэта.
Прэзідэнт Польшчы Караль Наўроцкі пад канец жніўня 2025 года прапанаваў прыраўнаць сімволіку Украінскай паўстанцкай арміі (УПА) да нацысцкай і савецкай і забараніць яе на заканадаўчым узроўні. Як ён кажа, гэта дапаможа абяззброіць расейскую прапаганду і пабудаваць польска-ўкраінскія адносіны на сапраўдным партнёрстве і ўзаемнай павазе ды разуменні. Праз два дні пасля з'яўлення гэтай навіны, 27 жніўня, у тэлеграм-канале «Зямля наша» апублікавалі пост, што на польска-ўкраінскай мяжы ў пошуках «бандэраўскай» сімволікі людзей распранаюць да майткоў і правяраюць тэлефоны:
«На польска-ўкраінскай мяжы зараз так. Польскія памежнікі распранаюць украінцаў да майткоў для агляду на прадмет наяўнасці наколак з бандэраўскай сімволікай. Таксама патрэбна адблакаваць тэлефон і перадаць яго польскаму контрвыведніку: ён праверыць гаджэт на наяўнасць сімпатый уласніка да чалавеканенавісніцкай антыпольскай ідэалогіі АУН-УПА. Калі рожа госця не спадабаецца спяцуры, у прынцыпе, могуць развярнуць нават за трызуб на пашпарце, абвясціўшы яго бандэраўскай атрыбутыкай».
У доказ сваіх словаў яго аўтары прымацавалі фота з інструкцыяй, зробленае нібыта на тэрыторыі памежнага пункта: распрануцца і адблакаваць тэлефон для праверкі.
Каманда WTF праверыла — здымак апынуўся падробкай. Мы знайшлі такое ж фота, зробленае на пункце пропуску «Рава-Руська — Храбенне» два гады таму. У плаката на ім іншы змест: ён тлумачыць, як аплаціць і скарыстацца прыбіральняй.
Польская памежная служба пацвердзіла правільнасць нашай знаходкі. У адказ на запыт мы атрымалі паведамленне:
«Аспрэчваем. Гэта класічны прыклад дэзынфармацыі. Для яго стварэння выкарыстаны рэальны элемент інфраструктуры памежнага пераходу ў Храбенне — банер, што інфармуе пра магчымасць скарыстацца прыбіральняй».
