Рыгор Азаронак і палітолаг Андрэй Лазуткін 19 жніўня 2025 года ў эфіры праграмы «Азаронак. Наўпрост» на ютуб-канале «Беларусь. Рыгор Азаронак» абмеркавалі нацыянальнае пытанне:
— Вось, ёсць некаторыя такія дэгенераты, якія там: «Ай, ніякіх украінцаў няма, ніякіх беларусаў няма, гэта ўсё, значыць там, выдуманыя нейкія Леніным»... Ці то Леніным, ці то Сталіным, ці то яшчэ кімсьці народнасці, супольнасці і гэтак далей. Ну, калі ласка, вы вось так, вось з такой рыторыкай вы пацвярджаеце ўсю іх прапаганду. Вы пацвярджаеце ўсю іх прапаганду, якая кажа пра тое, што, там, рускія ідуць для таго, каб вас усіх да нагі, значыць, бізуном сцябаць, там, знішчыць вашу, там, калыску, пісню, і матчыну мову, і ўсё астатняе <...> , — выказаўся вядоўца праграмы.
— Пуцін, калі быў на Алясцы, ён як выказаўся пра ўкраінцаў? Гэта братэрскі ўкраінскі народ, не адзін народ, а менавіта братэрскі і ўкраінскі. Гэта значыць няма вось гэтага адмаўлення, — прывёў прыклад Лазуткін.
Уладзімір Пуцін неаднаразова адмаўляў самастойнасць украінскага народу, задоўга да пачатку поўнамаштабнай вайны. Напрыклад, у 2015 годзе падчас мітынгу прэзідэнт Расеі сказаў: «Дарагія сябры! Мы заўсёды ў Расеі лічылі, што рускія і ўкраінцы — гэта адзін народ. Я і так думаю. Я так думаю і цяпер».
Аднак такая рыторыка ў яго была не заўсёды. У 2004-м на адмысловай наўпроставай лініі з грамадзянамі Украіны Пуцін казаў: «Расея павінна была ўсвядоміць, што дзяржавы, якія ўзніклі на постсавецкай прасторы, — гэта не квазіпостсавецкія ўтварэнні, а незалежныя паўнавартасныя краіны, і да іх адпаведным чынам трэба ставіцца. <...> Гэта не што іншае, як поўнае і абсалютнае прызнанне незалежнасці — і павага незалежнасці Украіны».
У 2008-м яго пункт гледжання стаў менш адназначным. На саміце NATO у Бухарэсце аб намерах Украіны ўступіць у Альянс Пуцін выказаўся так: «З 45 мільёнаў чалавек, паводле афіцыйнага перапісу, толькі 17 мільёнаў расейцаў. Ёсць рэгіёны, дзе цалкам толькі рускае насельніцтва пражывае, скажам, у Крыме. 90% — гэта рускія. Украіна, наогул, складаная вельмі дзяржава».
Годам пазней (пасля вайны з Грузіяй і Мюнхенскай прамовы, дзе Пуцін заявіў аб непрыняцці так званага аднапалярнага свету і пра пагрозу Расеі з боку NATO) яго рыторыка змянілася. У 2009-м ён захапляўся поглядамі белагвардзейца Антона Дзянікіна: «Абавязкова прачытайце! Там у яго ёсць развагі аб вялікай і малой Расеі, Украіне. Ён кажа, што нікому не павінна быць дазволена ўмешвацца ў адносіны паміж намі, гэта заўсёды было справай самой Расеі!»
За пару месяцаў да пачатку поўнамаштабнай вайны з Украінай падчас штогадовай прэс-канферэнцыі расейскі прэзідэнт сказаў: «Як Украіна-та складвалася? Хто яе стварыў-та? Ленін Уладзімір Ільіч. Калі ствараў Савецкі Саюз». А ў лютым 2022-га — за тры дні да поўнамаштабнага ўварвання: «Сучасная Украіна цалкам была створаная Расеяй. Дакладней бальшавіцкай, камуністычнай Расеяй. У выніку бальшавіцкай палітыкі і ўзнікла савецкая Украіна, якую і ў нашы дні можна назваць "Украіна імя Уладзіміра Ільіча Леніна" — ён яе аўтар і архітэктар».
Пра адзінства з беларусамі лідар Расейскай Федэрацыі выказваецца радзей і звычайна ў кантэксце разважанняў пра ўкраінскі народ. У артыкуле Уладзіміра Пуціна «Аб гістарычным адзінстве рускіх і ўкраінцаў», апублікаваным на афіцыйным сайце Крамля ў 2021 годзе, сказана: «Можа прагучаць аргумент: раз вы кажаце пра адзіную вялікую нацыю, трыадзіным народзе, то якая розніца, кім людзі сябе лічаць — рускімі, украінцамі або беларусамі. Цалкам з гэтым згодны».
