Пасля саміту ШАС, які прайшоў з 31 жніўня па 1 верасня 2025 года, у Пекіне правялі вайсковы парад, прысвечаны юбілею сканчэння Другой сусветнай вайны. Мерапрыемства і падзеі 80-гадовай даўніны 4 верасня 2025 года абмеркавалі ў эфіры Першага нацыянальнага каналу Беларускага радыё. Доктар гістарычных навук Вячаслаў Даніловіч заявіў, што СССР пасля Другой сусветнай не далучаў чужых земляў:
«Савецкі Саюз не забраў ніякіх тэрыторый, якія калісьці б не ўваходзілі ў склад той жа самай Расейскай імперыі, не. Былі вернутыя, фактычна, тэрыторыі. Ну а, ізноў жа, тыя ж самыя Злучаныя Штаты — паглядзіце на вынікі гэтай Другой сусветнай вайны для іх. Яны, фактычна, акупавалі Японію».
Гэта версія гісторыка не адпавядае рэчаіснасці. Тэрыторыя Калінінградскай вобласці ніколі не ўваходзіла ў склад Расейскай імперыі. Гэта частка нямецкай правінцыі Усходняя Прусія. Яна ўвайшла ў склад СССР па выніках Патсдамскай канферэнцыі 1945 года.
Закарпацкая Украіна ці Падкарпацкая Русь была часткай Вугоршчыны. Пасля развалу Аўстра-Вугорскай імперыі гэтыя тэрыторыі пабывалі пад кантролем Чэхаславакіі, а па выніках вайны ўвайшлі ў склад СССР. Букавінская вобласць — таксама не адносілася да ўладанняў Расейскай імперыі. Гэта частка Аўстра-Вугоршчыны, якая пасля яе распаду адышла Румыніі. У 1940 годзе СССР выставіў ультыматум Румыніі і запатрабаваў гэтыя тэрыторыі сабе. Так яны сталі Чарнавіцкай вобласцю ў складзе Украінскай Савецкай Сацыялістычнай Рэспублікі.
Усходняя Галічына — гэта заходняя частка сучаснай Украіны: Львоўская, Івана-Франкоўская і частка Тарнопальскай абласцей. Яна ўваходзіла ў склад Польшчы і Аўстрыйскай імперыі. Падчас Першай сусветнай вайны яе часова акупавалі расейскія войскі, але потым страцілі. У 1939 годзе, па выніках сумеснага нападу СССР і Трэцяга Рэйху на Польшчу, Усходнюю Галічыну ўключылі ў склад Савецкага Саюзу.
