Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Журналісты БРЦ – лаўрэаты нацыянальнай прэміі «Вольнае слова» Беларускай асацыяцыі журналістаў за расследаванні ў 2018, 2019, 2020, 2021 і 2022 гадах. На «Вольным слове» у 2021 годзе каманда БРЦ атрымала першае месца ў катэгорыі «Аналітыка».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
Вядоўца СТБ расказала, што ў Літве выраслі цэны, але не разабралася, на што і наколькі
Паказнік інфляцыі ў суседзяў у «Навінах» перабольшылі больш чым у шэсць разоў.
У Літве цэны на малако за год выраслі амаль на траціну, а інфляцыя пераваліла за 20%, заявіла вядоўца СТБ. Каманда Weekly Top Fake палічыла, у колькі разоў яна перабольшыла лічбы.
Пра павелічэнне цэн на энерганосьбіты, рост падаткаў і, як вынік, падаражэнне прадуктаў у Літве 26 сакавіка 2025 года распавяла вядоўца праграмы «Навіны» на тэлеканале СТБ:
«Тэндэнцыя на падаражэнне — так самі літоўцы характарызуюць становішча ў краіне. Насамперш гаворка ідзе пра прадукты харчавання. Толькі цэны на малако за год выраслі больш чым на 30%. … Цяпер інфляцыя ў Літве дасягнула без малога 22,5%».
Цэны на малако ў Літве сапраўды выраслі на 30%. Аднак гаворка ідзе пра закупныя цэны. То бок заводы, якія вырабляюць малочную прадукцыю (масла, сыры, ёгурты і гэтак далей), сталі больш плаціць фермерам. Эксперты кажуць, што прычына падаражэння — у зніжэнні аб'ёмаў вытворчасці сыравіны і росце попыту на яе.
Каманда WTFвывучыла цэтлікі на малочную прадукцыю ў крамах Літвы за апошні тыдзень сакавіка ў 2024 і ў 2025 гадах, каб даведацца, наколькі павелічэнне кошту сыравіны адбілася на кашальках спажыўцоў. Менш за ўсё падаражэла нятлустае малако — за год амаль на 3%. Масла — на 7%. Нятлусты тварог — на 11%. Гэта значыць, што вядоўца СТБ перабольшыла маштабы росту цэн на малочку ў Літве. У Беларусі, паводле дадзеных Белстату, масла за год падаражэла на 5%, малако і тварог — на 7%.
Інфляцыя ў Літве, якая, паводле слоў вядоўцы СТБ, ужо пераваліла за 20%, у лютым у гадавым выражэнні склала 3,5%. У Беларусі тым часам паказнік дасягнуў 5,6%
