Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Нашыя журналісты атрымалі прэмію Ганса Штайгэра за журналісцкія расследаванні ад Міжнароднага цэнтру журналістаў (ICFJ), прэмію за свабодныя СМІ (Free Media Award) ад фондаў ZEIT-Stiftung Bucerius і Fritt Ord, а таксама прэмію за дасягненні ў журналістыцы дадзеных (Data Journalism Award) ад Грамадства садзейнічання развіццю працоўнай дзейнасці журналістаў і рэдакцыі (SABEW). Наш праект Dubai Unlocked увайшоў «у шорт-ліст» Sigma Awards.
З 2018 па 2026 год нашыя журналісты таксама атрымалі 11 узнагародаў беларускай нацыянальнай прэміі «Вольнае слова».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
Вядоўца АНТ папракнула Захад, што ў іх няма свята Дзень Перамогі. Праверылі, што яны святкуюць
Наталля Макарэвіч заявіла, што заходнія краіны адзначаюць Дзень прымірэння.
Чаму краіны Захаду замест Дня Перамогі святкуюць Дзень прымірэння? Такім пытаннем задалася вядоўца АНТ Наталля Макарэвіч. Каманда Weekly Top Fake праверыла, як хаўруснікі СССР па антыгітлераўскай кааліцыі ў гады Другой сусветнай вайны называюць 8 траўня.
Гаворка пра назву святаў у краінах Еўропы зайшла падчас гутаркі вядоўцы АНТ Наталлі Макарэвіч з вядучай навуковай супрацоўніцай Цэнтру вайсковай гісторыі Беларусі Аляксандрай Кузняцовай-Ціманавай 13 траўня 2025 года ў перадачы «Твар да твару».
«Чаму краіны, якія былі тады нашымі хаўруснікамі, адзначаюць гэты дзень не разам з намі, хай гэта будзе 8 траўня, але гэта Дзень прымірэння, не Перамогі. З кім яны мірацца і чаму так не хочуць разам з намі святкаваць?» — спытала вядоўца праграмы.
У ЗША, паводле дэкларацыі прэзідэнта Доналда Трампа, з 2025 года 8 траўня называецца Днём перамогі ў Другой сусветнай вайне. Але і раней гэта быў дзень Перамогі — Дзень перамогі ў Еўропе.
У Францыі афіцыйная назва свята — Дзень Перамогі 1945 года. У Вялікай Брытаніі 8 траўня святкуюць Дзень Перамогі ў Еўропе. Польшча з 2015 года 8 траўня афіцыйна адзначае Нацыянальны дзень перамогі (раней свята называлася ў іх Нацыянальны дзень перамогі і волі). Чэхія называе 8 траўня проста Дзень Перамогі.
У Літве і Латвіі адзначаюць Дзень памяці ахвяр Другой сусветнай вайны. У Латвіі ў дадатак ёсць Дзень перамогі над нацызмам.
Днём прымірэння 8 траўня не называюць і ў краінах гітлераўскай кааліцыі. У Нямеччыне, Аўстрыі і Італіі — гэта Дзень вызвалення. Толькі Італія святкуе яго 25 красавіка.
Свята з назвай Дзень прымірэння 8 і 9 траўня абвясціла ў 2004 годзе толькі Арганізацыя Аб'яднаных Нацый у памяць пра загінулых у Другой сусветнай вайне. Як гаворыцца ў рэзалюцыі ААН, для прыгадвання ўсіх высілкаў па мірным урэгуляванні спрэчак. Пры гэтым арганізацыя асабліва падкрэслівае, што нельга забываць Халакост і іншыя злачынствы, здзейсненыя нацыстамі.
