У лістах, якія атрымліваюць беларусы, прапануецца пакінуць асабістыя дадзеныя для сувязі і пазначыць зручны час для невялікага сумоўя. Таксама ў паведамленні фігуруе фота ўзору пашпарту Новай Беларусі.
Гэтыя паведамленні фэйкавыя, заявілі ў прадстаўніцтве Аб'яднанага пераходнага кабінету па замежных справах. Яны створаныя, каб збіраць асабістыя дадзеныя.
«Гэта чарговы фэйк ад рэжыму, які ставіць мэту сабраць персанальныя дадзеныя беларусаў. У праекта новага нацыянальнага пашпарту Беларусі няма ніякай валанцёрскай службы. Мы не збіраем і не плануем збіраць ніякія персанальныя звесткі беларусаў праз інтэрнэт», — растлумачылі ў АПК.
Фота дакумента, якое рассылаюць беларусам, 19 сакавіка 2024 года паказаў на АНТ праўладны журналіст Ігар Тур. Ён заявіў, што яго здабылі беларускія спецслужбы. Акрамя гэтага яны нібыта займелі базу дадзеных тых, хто падаў заяўку на новы пашпарт.
Гэта, па словах прадстаўніка ОПК Валерыя Кавалеўскага, таксама фэйк, таму што ўзору пашпарта яшчэ не існуе і збор заявак на яго атрыманне не адкрываўся.
У Аб'яднаным пераходным кабінеце таксама дадалі, што тыя, у каго ўзнікаюць якія-небудзь сумневы, могуць звязацца з прадстаўніцтвам па замежных справах з дапамогай афіцыйных старонак у сацсетках Facebook і Instagram, адправіць паведамленне ў Telegram.
