Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Журналісты БРЦ – лаўрэаты нацыянальнай прэміі «Вольнае слова» Беларускай асацыяцыі журналістаў за расследаванні ў 2018, 2019, 2020, 2021 і 2022 гадах. На «Вольным слове» у 2021 годзе каманда БРЦ атрымала першае месца ў катэгорыі «Аналітыка».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
«Дадзеныя нямецкай прэсы». Васкрасенскі прыдумаў факт пра колькасць украінак, уцягнутых у прастытуцыю ў Берліне
Die Welt ў 2024 годзе апублікаваў матэрыял пра нямецкую секс-індустрыю.
У адным толькі Берліне ў секс-індустрыю ўцягнутыя 200 тысяч украінак, заявіў палітолаг Юрый Васкрасенскі ў эфіры АНТ, спаслаўшыся на выданне Die Welt. Каманда Weekly Top Fake высветліла, што пісала нямецкая газета, а чаго не.
Палітолаг Юрый Васкрасенскі ў ток-шоу «Аб'ектыўна» на тэлеканале АНТ 12 лютага 2025 года абвінаваціў Украіну ў тым, што, абараняючыся ад ваеннай агрэсіі, яна штурхае сваіх жанчын на панэль:
«Тое, што цяпер яны робяць са сваім народам, — забіваюць мужчын, жанчын у бардэлі ўсе перавозяць. Гэта ніякія не прапагандысцкія штампы. Ёсць у нас, дапусцім, паважанае, у двукоссях, нямецкае выданне Die Welt. Яно сказала, што ў Берліне працуе 400 тысяч жанчын лёгкіх паводзінаў, з іх 200 тысяч — украінкі. Гэта толькі ў Берліне! Гэта я прыводжу звесткі нямецкай прэсы».
Die Welt ў 2024 годзе апублікаваў матэрыял пра нямецкую секс-індустрыю. Працаўніца сацыяльных службаў у інтэрв'ю выданню распавяла, што, паводле яе ацэнак, пасля пачатку поўнамаштабнай вайны Расеі супраць Украіны ў Берліне сярод жанчын, уцягнутых у прастытуцыю, стала больш украінак.
«Раней украінскія жанчыны былі мала прадстаўлены ў гэтым асяроддзі. Большасць жанчын, з якімі мы працуем у Берліне, на самой справе прыязджаюць з Усходняй Еўропы: Балгарыі, Румыніі і Вугоршчыны, а цяпер і з Украіны. У публічных дамах цяпер, я б сказала, іх каля 50 адсоткаў. Праз вайну сюды прыехала шмат вельмі маладых жанчын», — напісана ў матэрыяле.
Сярод прычын суразмоўніца называе няведанне жанчынамі сваіх правоў і выкарыстанне іх уразлівага становішча мужчынамі. Аднак у матэрыяле не згадваецца колькасць прастытуяваных жанчын.
Ацэнка ў 400 тысяч колькасці жанчын, уцягнутых у прастытуцыю, усё ж сустракаецца ў нямецкай прэсе. У студзені 2024 года пра гэта пісалі ў Die Tagesschau. Праўда, там гаворка пра ўсю Нямеччыну, а не пра Берлін. І гэта арыенціровачная колькасць.
