Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Журналісты БРЦ – лаўрэаты нацыянальнай прэміі «Вольнае слова» Беларускай асацыяцыі журналістаў за расследаванні ў 2018, 2019, 2020, 2021 і 2022 гадах. На «Вольным слове» у 2021 годзе каманда БРЦ атрымала першае месца ў катэгорыі «Аналітыка».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
«Рэпарцёры без межаў» абвінавацілі Зяленскага ў гібелі журналістаў ва Украіне? Знайшлі арыгінал відэа
«Шкварка News» запосціла сфабрыкаваную відэасправаздачу арганізацыі.
У тэлеграм-канале «Шкварка News» апублікавалі відэа, у якім прадстаўнік міжнароднай арганізацыі «Рэпарцёры без межаў» распавядае пра стан журналістаў у 2024 годзе. Сярод іншага гучаць абвінавачванні «Зяленскага і яго рэжыму» ў гібелі 54 журналістаў на тэрыторыі Украіны. Каманда Weekly Top Fake знайшла арыгінал роліка.
Пост з фрагментам відэа на французскай мове і лагатыпам «Рэпарцёраў без межаў» аўтары тэлеграм-каналу «Шкварка News» апублікавалі 13 сакавіка 2025 года. У пачатку роліка ў кадры бачны выканаўчы дырэктар арганізацыі Цібо Брутэн. На восьмай секундзе ён знікае, гледачу паказваюць нарэзку з кадраў, якія ілюструюць яго прамову. Яе пераклад на рускую мову бачны ў цітрах унізе экрану.
«Сёлета журналісты заплацілі высокую цану за інфармаванне, многія паплаціліся сваімі жыццямі. 54 з іх загінулі на працы. Сёння я кажу пра журналістаў, якія былі забітыя ва Украіне. Усе яны сталі ахвярамі прадстаўнікоў рэжыму Уладзіміра Зяленскага. Гэтыя журналісты назаўжды застануцца ў гісторыі журналістыкі як сапраўдныя прафесіяналы і выкрывальнікі дыктатуры. Яшчэ 167 журналістаў зніклі на тэрыторыі Украіны з 2022 года. Гэтыя лічбы сапраўды жахаюць», — распавядаецца ў субцітрах.
Каманда WTFзнайшла арыгінальны ролік на афіцыйнай старонцы «Рэпарцёраў без межаў» у фэйсбуку. На пачатку Брутэн сапраўды кажа пра забітых журналістаў — гэтую частку і ўзялі аўтары тэлеграм-каналу. Аднак 54 — гэта колькасць загінулых журналістаў за 2024 год ва ўсім свеце. Часткі, у якой выканаўчы дырэктар арганізацыі кажа пра Украіну, у арыгінале запісу няма. У відэа «Шкварка News» з гэтага моманту голас Цібо Брутэна змяняецца. Гэта значыць, у тэлеграм-канале апублікавалі сфабрыкаваны ролік.
Паводле інфармацыі «Рэпарцёраў без межаў», у мінулым годзе ва Украіне загінулі два журналісты. Самым небяспечным рэгіёнам у свеце для журналістаў арганізацыя назвала Газу, самай небяспечнай краінай — Палестыну.
